పశ్చిమ బెంగాల్ సీఎం సువేందు అధికారిని కలిసిన మంత్రి లోకేశ్

Nara Lokesh: ఆంధ్రప్రదేశ్, పశ్చిమ బెంగాల్ రాష్ట్రాల మధ్య ద్వైపాక్షిక బంధాన్ని, ఆర్థిక సంబంధాలను మరింత బలోపేతం చేసే దిశగా ఒక కీలక అడుగు పడింది.

ఏపీ ఐటీ, విద్యాశాఖ మంత్రి నారా లోకేశ్ కోల్‌కతా పర్యటనలో భాగంగా పశ్చిమ బెంగాల్ ముఖ్యమంత్రి సువేందు అధికారితో మర్యాదపూర్వకంగా భేటీ అయ్యారు. ఈ సందర్భంగా బెంగాల్ సీఎంకు లోకేశ్ ఆత్మీయ స్వాగతం పలుకుతూ, మంగళగిరి ప్రత్యేక చేనేత శాలువాతో ఆయనను ఘనంగా సత్కరించారు.

ఈ ఉన్నత స్థాయి సమావేశంలో మంత్రి లోకేశ్.. ఆంధ్రప్రదేశ్‌లో చంద్రబాబు నాయుడు నేతృత్వంలోని ప్రభుత్వం అమలు చేస్తున్న సరికొత్త పాలనా సంస్కరణలను సువేందు అధికారికి వివరించారు. అత్యాధునిక సాంకేతికతను జోడించి అర్హులైన ప్రతి లబ్ధిదారునికి సంక్షేమ పథకాలను అవినీతి రహితంగా, అత్యంత పారదర్శకంగా అందిస్తున్న తీరును తెలియజేశారు. దీనితో పాటు, ఏపీలో పెట్టుబడులను వేగంగా ఆకర్షించేందుకు తాము తీసుకొచ్చిన ‘స్పీడ్ ఆఫ్ డూయింగ్ బిజినెస్’ విధానం గురించి ప్రత్యేకంగా ప్రస్తావించారు. డిజిటల్ గవర్నెన్స్, రియల్ టైమ్ మానిటరింగ్ సిస్టమ్స్ ద్వారా పాలనలో అద్భుతమైన ఫలితాలను సాధిస్తున్నామని ఈ సందర్భంగా లోకేశ్ పేర్కొన్నారు.

కోల్‌కతాలో టీటీడీ ఆలయం.. ఏపీలో బెంగాల్ భవన్

ఈ చర్చల్లో భాగంగా ఆధ్యాత్మిక, మౌలిక సదుపాయాల రంగాలకు సంబంధించిన పలు ప్రతిపాదనలు తెరపైకి వచ్చాయి. పశ్చిమ బెంగాల్‌లో శ్రీవారి భక్తుల కోసం తిరుమల తిరుపతి దేవస్థానం (TTD) ఆధ్వర్యంలో ఒక నూతన ఆలయ నిర్మాణానికి అనువైన స్థలాన్ని కేటాయించాలని మంత్రి లోకేశ్ బెంగాల్ సీఎంను కోరారు. ఇందుకు ప్రతిగా, పవిత్ర పుణ్యక్షేత్రమైన తిరుమలలో పశ్చిమ బెంగాల్ భక్తుల వసతి కోసం 'పశ్చిమ బెంగాల్ భవన్' నిర్మించుకోవడానికి ఆంధ్రప్రదేశ్ ప్రభుత్వం పూర్తి స్థాయిలో స్థలాన్ని, అవసరమైన సహాయ సహకారాలను అందిస్తుందని హామీ ఇచ్చారు.

దీనితో పాటు, ఇరు రాష్ట్రాలకు బలమైన ఆర్థిక వనరుగా ఉన్న మత్స్య సంపద (Aqua Culture) రంగంపై కూడా ఇరువురు నేతలు చర్చించారు. చేపలు, రొయ్యల పెంపకంతో పాటు ఎగుమతుల విషయంలో రెండు రాష్ట్రాలు పరస్పర సాంకేతిక పరిజ్ఞానాన్ని, వాణిజ్య సత్సంబంధాలను పంచుకుంటే మరింత ప్రగతి సాధించవచ్చని లోకేశ్ అభిప్రాయపడ్డారు. మంత్రి లోకేశ్ చేసిన ఈ వినూత్న ప్రతిపాదనలపై పశ్చిమ బెంగాల్ సీఎం సువేందు అధికారి సానుకూలంగా స్పందించారు.

Nara Lokesh: ఐసీసీ సదస్సులో లోకేశ్.. ఏపీకి పెట్టుబడులే లక్ష్యం

మంత్రి లోకేశ్ కోల్‌కతా పర్యటనలో మరో కీలక ఘట్టం చోటుచేసుకోనుంది. ఇండియన్ ఛాంబర్ ఆఫ్ కామర్స్ (ICC) ఆధ్వర్యంలో నిర్వహించనున్న పారిశ్రామిక వేత్తల సదస్సులో ఆయన పాల్గొననున్నారు. 'ఆంధ్రప్రదేశ్‌లో పెట్టుబడులకు ఉన్న అవకాశాలు' అనే అంశంపై జరగబోయే ఈ సదస్సులో ఏపీకి భారీగా పరిశ్రమలను, పెట్టుబడులను తీసుకురావడమే లక్ష్యంగా లోకేశ్ అక్కడి పారిశ్రామిక దిగ్గజాలతో ప్రసంగించనున్నారు.