పవన్ కళ్యాణ్ పై తెలంగాణ నేతల మూకుమ్మడి దాడి

Telangana State Formation Day : తెలంగాణ రాష్ట్ర ఆవిర్భావ దినోత్సవం సందర్భంగా హైదరాబాద్‌లో జనసేన పార్టీ ప్రతిష్టాత్మకంగా తలపెట్టిన బహిరంగ సభ రాజకీయంగా తీవ్ర దుమారాన్ని రేపుతోంది.

ఈ నేపథ్యంలో జనసేన అధినేత పవన్ కల్యాణ్‌ను లక్ష్యంగా చేసుకుని అధికార కాంగ్రెస్ పార్టీ నాయకులు మూకుమ్మడి విమర్శలకు దిగుతున్నారు. తాజాగా కాంగ్రెస్ ఎమ్మెల్యే అనిరుధ్ రెడ్డి పవన్ కల్యాణ్ వైఖరిపై తీవ్రస్థాయిలో విరుచుకుపడ్డారు. గతంలో తెలంగాణ ప్రాంతాన్ని, ఇక్కడి అస్థిత్వాన్ని తీవ్రంగా అవమానించిన పవన్ కల్యాణ్‌కు ఇప్పుడు ఇక్కడ సభలు పెట్టాల్సిన అవసరం ఏమొచ్చిందని ఆయన ప్రశ్నించారు. ఆంధ్రప్రదేశ్ నాయకులు తెలంగాణ రాష్ట్రంపై నిరంతరం విద్వేషాన్ని చిమ్ముతుంటే, ఇక్కడి ప్రధాన ప్రతిపక్షమైన బీఆర్ఎస్ (BRS) పార్టీ ఎందుకు మౌనంగా ఉంటోందని, వారిపై ఎందుకు స్పందించడం లేదంటూ ఆయన నిలదీశారు.

బీఆర్ఎస్ మౌనంపై తీవ్ర అభ్యంతరం

ఈ వివాదం సభ నిర్వహణకే పరిమితం కాకుండా, రెండు రాష్ట్రాల మధ్య ఉన్న ఉద్యోగుల విభజన అంశాన్ని కూడా ఎమ్మెల్యే అనిరుధ్ రెడ్డి తెరపైకి తెచ్చారు. ఆంధ్రప్రదేశ్‌కు చెందిన ఉద్యోగులు తెలంగాణలో అత్యంత విలాసవంతంగా, స్వర్గంలో ఉన్నట్లు జీవిస్తున్నారని.. అదే సమయంలో ఆంధ్రప్రదేశ్‌లో చిక్కుకుపోయిన మన తెలంగాణ ఉద్యోగులు అక్కడ అనేక ఇబ్బందులు మరియు కష్టాలను ఎదుర్కొంటున్నారని ఆయన ఆవేదన వ్యక్తం చేశారు. రెండు రాష్ట్రాల ఉద్యోగుల విభజన ప్రక్రియను త్వరితగతిన పూర్తి చేసి, ఏపీకి చెందిన ఉద్యోగులను తిరిగి వారి సొంత రాష్ట్రానికి పంపించివేయాలని ఆయన డిమాండ్ చేశారు. జూన్ 2న జరగబోయే జనసేన సభకు ముందే కాంగ్రెస్ నేతలు ఈ స్థాయిలో ప్రాంతీయ సెంటిమెంట్‌ను, ఉద్యోగుల అంశాన్ని లేవనెత్తడం ఇరు రాష్ట్రాల రాజకీయ వర్గాల్లో సరికొత్త ఉత్కంఠకు దారితీసింది.