పెద్ది సెన్సార్ రివ్యూ

PEDDI CENSOR Report OFFICIAL : మెగా పవర్‌స్టార్ రామ్ చరణ్, బాలీవుడ్ బ్యూటీ జాన్వీ కపూర్ జంటగా ఉప్పెన ఫేమ్ బుచ్చిబాబు సన దర్శకత్వంలో తెరకెక్కుతున్న మోస్ట్ అవేటెడ్ స్పోర్ట్స్ డ్రామా 'పెద్ది'.

ఇప్పటికే ముంబైలో ఘనంగా నిర్వహించిన ట్రైలర్ లాంచ్ ఈవెంట్‌తో అంచనాలు పెంచేసిన ఈ చిత్రానికి కేంద్ర చలనచిత్ర ప్రమాణీకరణ బోర్డు (CBFC) నుంచి ‘U/A 16+’ సర్టిఫికేట్ లభించింది. వృద్ధి సినిమాస్ మరియు ఐవీవై ఎంటర్‌టైన్‌మెంట్స్ సంయుక్తంగా నిర్మించిన ఈ చిత్రం జూన్ 4న ప్రపంచవ్యాప్తంగా థియేటర్లలో సందడి చేయనుంది. ఆడియో డిస్క్రిప్షన్ (AD), క్లోజ్డ్ క్యాప్షన్స్ (CC) మరియు ఇంగ్లీష్ సబ్‌టైటిల్స్‌తో రాబోతున్న ఈ సినిమా ఏకంగా 189 నిమిషాల (3 గంటల 9 నిమిషాలు) భారీ రన్‌టైమ్‌ను కలిగి ఉంది. అయినప్పటికీ, చిత్రంలో ఎమోషన్ మరియు యాక్షన్ డ్రామా ప్రేక్షకులను ఆకట్టుకుంటుందని మేకర్స్ ధీమా వ్యక్తం చేస్తున్నారు.

1980ల నాటి కుస్తీ నేపథ్యంలో ‘పెద్ది’ కథనం

ఈ సినిమా కథ విషయానికి వస్తే.. 1980ల కాలం నాటి ఆంధ్రప్రదేశ్ నేపథ్యంలో సాగుతుంది. ఇందులో రామ్ చరణ్ ‘పెద్ది పెహల్వాన్’ అనే పవర్‌ఫుల్ రెజ్లర్ (కుస్తీ యోధుడు) పాత్రలో కనిపించనున్నారు. క్రీడల ద్వారా తన గ్రామాన్ని ఏకం చేయడానికి, ప్రత్యర్థుల నుండి గ్రామం యొక్క ఆత్మగౌరవాన్ని కాపాడటానికి ఒక వీరుడు చేసిన పోరాటమే ఈ చిత్ర ప్రధాన ఇతివృత్తం. సమాజాన్ని క్రీడలు ఎలా ఉద్ధరిస్తాయనే అంశంతో పాటు హీరో ఎదుర్కొనే వ్యక్తిగత సవాళ్లను ఈ సినిమాలో అద్భుతంగా చూపించారు. ఇందులో జాన్వీ కపూర్ ‘అచ్చియమ్మ’ అనే భావోద్వేగభరితమైన పాత్రలో రామ్ చరణ్‌కు జోడీగా నటిస్తుండగా, కన్నడ సూపర్ స్టార్ శివరాజ్‌కుమార్ ‘గౌరునాయుడు’గా, సీనియర్ నటుడు జగపతిబాబు ‘అప్పలసూరి’గా కీలక పాత్రలు పోషించారు. వీరితో పాటు బోమన్ ఇరానీ, దివ్యేందు కూడా ముఖ్య పాత్రల్లో మెరవనున్నారు.

సెన్సార్ బోర్డు కట్స్

చిత్రంలోని కొన్ని అభ్యంతరకర డైలాగులు మరియు దృశ్యాలపై సెన్సార్ బోర్డు కత్తెర వేసింది. కథనంలో వచ్చే ఆరు బూతు పదాలను మ్యూట్ చేయడంతో పాటు, సబ్‌టైటిల్స్ నుండి కూడా తొలగించారు. (“లౌడేష్”, “బొక్క”, “లంబ్డి కొడకా”, “మాదర్‌చోద్”, “దొంగముండ కొడకా” మరియు “కాల్చి పడే దెంగుతా”) వంటి డైలాగులను ఆడియోలో మ్యూట్ చేయడంతో పాటు సబ్‌టైటిల్స్ నుండి కూడా పూర్తిగా తొలగించారు. వీటితో పాటు ఒక ఐటెం సాంగ్‌లో వచ్చే “సరుకు సామాన్” అనే పదాన్ని మార్చాల్సిందిగా బోర్డు ఆదేశించింది. అలాగే సమాజంలో నిర్దిష్ట వర్గాలను ఉద్దేశించినట్లుగా ఉన్న “రాజస్థాన్” అనే పదాన్ని మరియు ఒక కమ్యూనిటీ ప్రస్తావనను (2 గంటల 2 నిమిషాల సమయం వద్ద) తొలగించారు. ఒక సన్నివేశంలో చూపించిన ‘మిడిల్ ఫింగర్’ (మధ్య వేలు) చూపే అసభ్య సంకేతాన్ని కంప్యూటర్ గ్రాఫిక్స్ (CG) విజువల్స్ ద్వారా కవర్ చేశారు. అయితే ఈ కట్స్ మరియు మార్పుల వల్ల సినిమా నిడివిలో ఎలాంటి నష్టం జరగకుండా, నిర్మాతలు వాటిని సరిసమానమైన విజువల్స్‌తో రీప్లేస్ చేయడంతో తుది నిడివి 189 నిమిషాలుగానే లాక్ చేయబడింది.

ఇదిలా ఉంటే, హీరోయిన్ పాత్రపై దర్శకుడు బుచ్చిబాబు ఒక ఆసక్తికరమైన విషయాన్ని పంచుకున్నారు. మొదట ఈ ‘అచ్చియమ్మ’ పాత్రను జాన్వీ కపూర్ చెల్లెలు ఖుషీ కపూర్‌కు వినిపించారట. కానీ ఆమె చాలా చిన్నపిల్లగా అనిపించడంతో, ఒకే ఇంట్లో ఉంటూ ఖుషీని కాదని జాన్వీని ఎంపిక చేసుకోవాల్సి వచ్చిందని, ఈ పాత్రకు జాన్వీ మాత్రమే వంద శాతం న్యాయం చేయగలదని ఆయన పేర్కొన్నారు.