Tamilnadu Politics : తమిళ సినీ రంగం (Kollywood) నుండి రాజకీయాల్లోకి స్టార్లు రావడం అనేది దశాబ్దాలుగా వస్తున్న ఆచారమే. తాజాగా కోలీవుడ్ వర్గాల్లో ఇరుసుగా మారిన చర్చ ఏమిటంటే, నేషనల్ అవార్డ్ విన్నింగ్ యాక్టర్ ధనుష్ కూడా భవిష్యత్తులో ప్రత్యక్ష రాజకీయాల్లోకి అడుగుపెట్టే అవకాశం ఉందనే వార్త.

ఈ ఊహాగానాలకు ధనుష్ తండ్రి, సీనియర్ దర్శకుడు కస్తూరి రాజా చేసిన వ్యాఖ్యలు మరింత బలాన్ని చేకూర్చాయి. ఇటీవల ఒక బహిరంగ కార్యక్రమంలో ఆయనకు ధనుష్ రాజకీయ రంగప్రవేశంపై ప్రశ్న ఎదురవగా, ఆయన చాలా సానుకూలంగా స్పందించారు. ప్రజాసేవపై ఆసక్తి ఉన్న ఎవరికైనా రాజకీయాల్లోకి వచ్చే పూర్తి హక్కు ఉంటుందని, ఆ క్రమంలోనే తన కొడుకు ధనుష్‌తో పాటు తన మనవళ్లు కూడా భవిష్యత్తులో రాజకీయ బాట పట్టే అవకాశం ఉందని వ్యాఖ్యానించారు. ఈ వ్యాఖ్యలు తమిళనాడు రాజకీయ వర్గాల్లో ఒక్కసారిగా హాట్ టాపిక్‌గా మారాయి.

Read Also ; మరో రెండు మూడు రోజుల్లో కేరళకు నైరుతి రుతుపవనాలు

దళపతి విజయ్ దారిలోనే ధనుష్ వ్యూహం?

తమిళనాడులో అగ్ర కథానాయకుడు దళపతి విజయ్ ‘తమిళగ వెట్రి కళగం’ (TVK) పార్టీని స్థాపించి పూర్తిస్థాయి రాజకీయాల్లోకి వెళ్లిన సంగతి తెలిసిందే. విజయ్ తరహాలోనే ధనుష్ కూడా గత కొన్నేళ్లుగా తన అధికారిక అభిమాన సంఘాల (Fans Associations) ద్వారా తెరవెనుక పక్కా ప్రణాళికతో సామాజిక సేవా కార్యక్రమాలు నిర్వహిస్తున్నారు. పేద విద్యార్థులకు సాయం, ఉచిత వైద్య శిబిరాలు, విపత్తుల సమయంలో సహాయక చర్యలు వంటి కార్యక్రమాలతో క్షేత్రస్థాయిలో ప్రజలకు దగ్గరవుతున్నారు. సాధారణంగా తమిళ హీరోలు రాజకీయాల్లోకి వచ్చే ముందు తమ అభిమాన సంఘాలను సేవా సంస్థలుగా మార్చి బలాన్ని నిరూపించుకుంటారు, ఇప్పుడు ధనుష్ కూడా అదే మార్గంలో వెళ్తున్నట్లు విశ్లేషకులు భావిస్తున్నారు. ఒకవేళ ధనుష్ గనుక రాజకీయాల్లోకి వస్తే, ఇప్పటికే తాత కరుణానిధి వారసత్వంతో ఉన్న ఉదయనిధి స్టాలిన్, మరియు కొత్తగా వచ్చిన విజయ్ వంటి యంగ్ లీడర్ల మధ్య తమిళ రాజకీయ సమరం మరింత ఆసక్తికరంగా మారే అవకాశం ఉంది.