పెద్ది రన్‌టైమ్‌పై భారీ చర్చ

Peddi Movie Runtime : మెగా పవర్ స్టార్ రామ్ చరణ్ నటిస్తున్న 'పెద్ది' సినిమాపై ఇప్పటికే భారీ అంచనాలు నెలకొన్నాయి.

ఇప్పుడు ఈ మూవీ రన్‌టైమ్ గురించిన వార్తలు సోషల్ మీడియాలో వైరల్ అవుతున్నాయి. దర్శకుడు బుచ్చిబాబు సానా తెరకెక్కిస్తున్న స్పోర్ట్స్ యాక్షన్ డ్రామా 'పెద్ది' జూన్ 4న ప్రపంచవ్యాప్తంగా విడుదల కానుంది. ఇప్పటికే సినిమా పోస్టర్లు, గ్లింప్స్ ప్రేక్షకుల్లో మంచి ఆసక్తి పెంచాయి. తాజాగా మూవీ టీమ్ మే 18న ట్రైలర్ విడుదల చేయనున్నట్లు ప్రకటించడంతో అభిమానుల్లో హైప్ మరింత పెరిగింది.

ఇదిలా ఉండగా ప్రస్తుతం సోషల్ మీడియాలో ఈ సినిమా రన్‌టైమ్ గురించిన చర్చ జోరుగా సాగుతోంది. వైరల్ అవుతున్న సమాచారం ప్రకారం 'పెద్ది' మూవీ దాదాపు 3 గంటల 10 నిమిషాల నిడివితో ఉండొచ్చని ప్రచారం జరుగుతోంది. అంటే సినిమా మొత్తం 190 నిమిషాల పాటు ఉండే అవకాశం ఉందని టాక్ వినిపిస్తోంది. అయితే ఈ విషయంపై మూవీ యూనిట్ నుంచి ఇంకా అధికారిక ప్రకటన రాలేదు.

గ్రామీణ క్రికెట్ నేపథ్యంలో కథ

ఇటీవల భారీ సినిమాలకు లాంగ్ రన్‌టైమ్ ఉండటం సాధారణంగా మారింది. కథ బలంగా ఉంటే ప్రేక్షకులు కూడా ఎక్కువ నిడివిని అంగీకరిస్తారని మేకర్స్ భావిస్తున్నారు. 'పెద్ది' విషయంలో కూడా అదే ఫార్ములాను అనుసరిస్తున్నట్లు సినీ వర్గాలు చెబుతున్నాయి. ఈ సినిమా గ్రామీణ నేపథ్యంలోని క్రికెట్ టోర్నమెంట్ చుట్టూ తిరుగుతుందని సమాచారం. యాక్షన్‌తో పాటు బలమైన ఎమోషన్స్ కూడా కథలో కీలకంగా ఉండనున్నాయని తెలుస్తోంది. ప్రేక్షకులు పాత్రలతో కనెక్ట్ అయ్యేలా కథను డిజైన్ చేసినట్లు సమాచారం.

Read Also: Rajasekhar Tirumala visit: తిరుమలలో నటుడు రాజశేఖర్ ఫ్యామిలీ.. ఫోటోలు చూశారా?

భారీ తారాగణం.. ఏఆర్ రెహమాన్ సంగీతం

ఈ సినిమాలో హీరోయిన్‌గా జాన్వీ కపూర్ నటిస్తోంది. కీలక పాత్రల్లో శివ రాజ్‌కుమార్, జగపతి బాబు, దివ్యేందు శర్మ, బోమన్ ఇరానీ కనిపించనున్నారు. సంగీతాన్ని ఏఆర్ రెహమాన్ అందిస్తున్నారు. ఈ చిత్రాన్ని వెంకట సతీష్ కిలారు నిర్మిస్తున్నారు. మొదట ఈ సినిమాను మార్చి 27న విడుదల చేయాలని ప్లాన్ చేసినా, తర్వాత ఏప్రిల్ 30కు వాయిదా వేశారు. చివరికి జూన్ 4ను రిలీజ్ డేట్‌గా ఖరారు చేశారు. ప్రస్తుతం సినిమా షూటింగ్ చివరి దశలో ఉన్నట్లు సమాచారం. ఫైనల్ షెడ్యూల్‌లో ప్రత్యేక సాంగ్ షూట్ చేస్తున్నారని, ఇందులో శృతి హాసన్ స్పెషల్ అప్పియరెన్స్ ఇవ్వొచ్చని టాక్ నడుస్తోంది. ఇక 'పెద్ది' తర్వాత రామ్ చరణ్ దర్శకుడు సుకుమార్‌తో కొత్త సినిమా చేయనున్నట్లు సినీ వర్గాల్లో చర్చ సాగుతోంది.