ఏపీ పదో తరగతి విద్యార్థుల సుదీర్ఘ నిరీక్షణకు తెరపడనుంది. రేపు (ఏప్రిల్ 30, 2026) ఆంధ్రప్రదేశ్ విద్యాశాఖ పదో తరగతి ఫలితాలను విడుదల చేయబోతోంది.

ఈ మేరకు విద్యాశాఖ అన్ని ఏర్పాట్లను సిద్ధం చేసింది. ఆంధ్రప్రదేశ్ రాష్ట్ర ఐటీ మరియు విద్యాశాఖ మంత్రి నారా లోకేశ్ రేపు ఉదయం 11 గంటలకు ‘X’ (గతంలో ట్విట్టర్) వేదికగా డిజిటల్ పద్ధతిలో ఈ ఫలితాలను విడుదల చేయనున్నారు. ఈ ఏడాది మార్చి 16వ తేదీ నుంచి ఏప్రిల్ 1వ తేదీ వరకు జరిగిన పదో తరగతి పరీక్షలకు రాష్ట్రవ్యాప్తంగా సుమారు 6.30 లక్షల మంది విద్యార్థులు హాజరయ్యారు. పరీక్షలు ముగిసిన కొద్ది రోజుల్లోనే అత్యంత వేగంగా మూల్యాంకన ప్రక్రియను పూర్తి చేసిన విద్యాశాఖ, సాంకేతిక ఇబ్బందులు తలెత్తకుండా ఫలితాల వెల్లడికి కసరత్తు పూర్తి చేసింది.

Read Also : Meghalaya Honeymoon Murder Case Bail: మేఘాలయ హనీమూన్ హత్య కేసు.. సోనమ్‌కు బెయిల్ మంజూరు

ఫలితాలను తనిఖీ చేసే విధానం.. వెబ్‌సైట్లు ఇవే

ఫలితాలు విడుదలైన వెంటనే విద్యార్థులు అధికారిక వెబ్‌సైట్ bse.ap.gov.in లో తమ హాల్ టికెట్ నంబర్‌ను నమోదు చేసి మార్కుల జాబితాను డౌన్‌లోడ్ చేసుకోవచ్చు. ప్రభుత్వ వెబ్‌సైట్‌తో పాటు ‘మనబడి’ (Manabadi) వంటి ఇతర ప్రైవేట్ పోర్టల్స్‌లో కూడా ఫలితాలు అందుబాటులో ఉంటాయి. ఫలితాల అనంతరం రీ-వెరిఫికేషన్ లేదా సప్లిమెంటరీ పరీక్షలకు సంబంధించిన షెడ్యూల్‌ను కూడా రేపే ప్రకటించే అవకాశం ఉంది. విద్యార్థులు తమ గ్రేడ్లు మరియు సబ్జెక్టుల వారీగా సాధించిన మార్కులను వెంటనే చూసుకునేలా అధికారులు సర్వర్ల సామర్థ్యాన్ని పెంచారు.