Instagram Fraud: సోషల్ మీడియాలో విలాసవంతమైన జీవితాన్ని చూపిస్తూ, అమాయక యువతులను ట్రాప్ చేస్తున్న ఒక కిలేడీ ముఠా గుట్టును జూబ్లీహిల్స్ పోలీసులు రట్టు చేశారు.

ఇన్‌స్టాగ్రామ్ వేదికగా సాగుతున్న ఈ భారీ స్కామ్‌లో ప్రధాన నిందితుడు అర్జున్ (అలియాస్ ఆజాద్)ను గతంలోనే అరెస్ట్ చేయగా, తాజాగా అతని సోదరుడు రాజీవ్‌ను పోలీసులు బెంగళూరులో పట్టుకున్నారు.

Read Also: Shamshabad Accident: శంషాబాద్‌ రోడ్డు ప్రమాద మృతులకు కేటీఆర్ నివాళి

ఆడంబరమే పెట్టుబడి.. ప్రేమే ఆయుధం!

ఈ ముఠా వ్యూహం అత్యంత ఖరీదైనది. అర్జున్, రాజీవ్‌లు ఖరీదైన కార్లు, బ్రాండెడ్ దుస్తులు ధరించి స్టార్ హోటళ్లలో విందులు చేస్తున్నట్లు రీల్స్ పోస్ట్ చేసేవారు. ముఖ్యంగా బంజారాహిల్స్, జూబ్లీహిల్స్ వంటి ప్రాంతాల్లోని ధనవంతులైన యువతులను టార్గెట్ చేసేవారు. ఫ్రెండ్ రిక్వెస్ట్‌లతో మొదలై, నమ్మకం కుదిరాక ప్రేమ నాటకం ఆడేవారు. పెళ్లి చేసుకుంటామని నమ్మబలికి, యువతుల వ్యక్తిగత ఫోటోలు, వీడియోలను సేకరించడమే వీరి ప్రధాన లక్ష్యం.

బ్లాక్‌మెయిలింగ్‌తో లక్షల వసూళ్లు

నమ్మకం కుదిరిన తర్వాత అసలు రూపం బయటపెట్టేవారు. యువతుల వ్యక్తిగత ఫోటోలను చూపిస్తూ లక్షలాది రూపాయలు డిమాండ్ చేసేవారు. ఒక ప్రముఖ వ్యాపారవేత్త కుమార్తెను బ్లాక్‌మెయిల్ చేసి సుమారు రూ. 13 లక్షలు వసూలు చేయడమే కాకుండా, ఆ డబ్బుతో కారు కూడా కొనుగోలు చేశారు. మరో యువతి నుంచి బంగారు గొలుసు కూడా లాక్కున్నట్లు పోలీసులు గుర్తించారు.

10 మందికి పైగా బాధితులు

పోలీసుల విచారణలో దిగ్భ్రాంతికరమైన విషయాలు వెలుగులోకి వచ్చాయి. ఈ ముఠా ఇప్పటివరకు 10 మందికి పైగా యువతులను ఇదే తరహాలో మోసం చేసింది. నిందితుడు అర్జున్‌పై ఇప్పటికే పలు పోలీస్ స్టేషన్లలో క్రిమినల్ కేసులు ఉన్నాయి. ఈ ముఠాలో మరో 10 మంది వరకు సభ్యులు ఉన్నట్లు అనుమానిస్తున్న పోలీసులు, వారి కోసం గాలింపు వేగవంతం చేశారు.