రీయూజబుల్ రాకెట్ ఇంజిన్ పరీక్ష విజయవంతం

Abyom SpaceTech and Defence: భారతీయ ప్రైవేట్ అంతరిక్ష రంగంలో హైదరాబాద్‌కు చెందిన ప్రముఖ స్పేస్‌టెక్ స్టార్టప్ సంస్థ "అబ్యోమ్ స్పేస్‌టెక్ & డిఫెన్స్" (Abyom SpaceTech and Defence) ఒక సరికొత్త చరిత్రను సృష్టించింది.

పూర్తిగా మన దేశీయ సాంకేతికతతో తయారు చేసిన 'రీయూజబుల్ లిక్విడ్ రాకెట్ ఇంజిన్' (పునర్వినియోగ ద్రవ ఇంధన రాకెట్ ఇంజిన్) క్వాలిఫికేషన్ పరీక్షలను ఈ సంస్థ విజయవంతంగా పూర్తి చేసింది. అంతరిక్ష ప్రయోగాల్లో అయ్యే భారీ వ్యయాన్ని గణనీయంగా తగ్గించే దిశగా భారత్ వేసిన అడుగుల్లో ఈ విజయం అత్యంత కీలకమైన మైలురాయిగా నిలవనుంది.

ఈ ప్రతిష్టాత్మక పరీక్షలను కంపెనీకి చెందిన సొంత కమర్షియల్ టెస్ట్ ఫెసిలిటీలో నిర్వహించారు. ఈ విజయవంతమైన ప్రయోగం, సంస్థ త్వరలోనే చేపట్టబోయే 'హోప్' (HOPE - వర్టికల్ టేకాఫ్ అండ్ వర్టికల్ ల్యాండింగ్) అనే అత్యాధునిక పునర్వినియోగ రాకెట్ ప్రాజెక్టుకు, అలాగే క్రయోజెనిక్ ఇంజిన్ల రూపకల్పనకు బలమైన పునాదిగా మారనుందని కంపెనీ ప్రతినిధులు సంతోషం వ్యక్తం చేశారు. ఈ ప్రయోగంలో ఉపయోగించిన ఇంజిన్ సిస్టమ్స్, కంట్రోల్ ఆర్కిటెక్చర్ వంటి ప్రతి ఒక్క పరికరాన్ని తమ సొంత ఇంజనీరింగ్ బృందమే దేశీయంగా అభివృద్ధి చేసిందని అబ్యోమ్ వెల్లడించింది.

అంతరిక్ష ప్రయాణాలు మరింత చౌక: సంస్థ సీఈవో జైనుల్ అబిదీన్

ఈ అద్భుత విజయంపై అబ్యోమ్ స్పేస్‌టెక్ సంస్థ వ్యవస్థాపకుడు, సీఈవో జైనుల్ అబిదీన్ మాట్లాడుతూ "భారతదేశంలో స్వదేశీ పునర్వినియోగ ప్రొపల్షన్ వ్యవస్థలను (Reusable Propulsion Systems) నిర్మించాలనే మా సంకల్పంలో ఈ పరీక్షల విజయం ఎంతో కీలకమైనది. అంతరిక్ష రంగంలో లాంచ్ ఖర్చులను భారీగా తగ్గించడానికి ఇవి ఎంతగానో దోహదపడతాయి. అత్యంత తక్కువ బడ్జెట్‌తో కూడిన రీయూజబుల్ స్పేస్‌ఫ్లైట్ టెక్నాలజీని ప్రపంచానికి పరిచయం చేసే దిశగా మేము వేగంగా ముందుకు సాగుతున్నాం" అని ఆత్మవిశ్వాసం వ్యక్తం చేశారు.

Abyom SpaceTech and Defence: బిట్స్ పిలానీ హైదరాబాద్ నుంచి గ్లోబల్ స్పేస్ రేస్ వరకు..

అబ్యోమ్ స్టార్టప్ ప్రస్థానం 'బిట్స్ పిలానీ' (BITS Pilani) హైదరాబాద్ క్యాంపస్ ఇంక్యుబేటర్ నుండి ప్రారంభమవ్వడం విశేషం. అతి తక్కువ కాలంలోనే విశేష వృద్ధిని సాధించిన ఈ సంస్థకు ఐఐటీ మద్రాస్, ఐఐటీ బాంబే వంటి ప్రతిష్టాత్మక విద్యాసంస్థలతో పాటు కేంద్ర ప్రభుత్వ విభాగాలైన డిపార్ట్‌మెంట్ ఆఫ్ సైన్స్ అండ్ టెక్నాలజీ (DST), ఇస్రో (ISRO), మినిస్ట్రీ ఆఫ్ ఎలక్ట్రానిక్స్ అండ్ ఇన్ఫర్మేషన్ టెక్నాలజీ (MeitY) ల నుండి గట్టి మద్దతు లభిస్తోంది. రాబోయే కాలంలో రీయూజబుల్ రాకెట్ ప్రోటోటైప్ ప్రదర్శనలు, మరింత శక్తివంతమైన క్రయోజెనిక్ ఇంజిన్ల అభివృద్ధిపైనే తమ పూర్తి దృష్టి ఉంటుందని సంస్థ స్పష్టం చేసింది.