ర్యాగింగ్‌కు శాశ్వతంగా అడ్డుకట్ట వేయాలని డిమాండ్‌.సంగారెడ్డి జిల్లా చౌటుకూరు మండల పరిధిలోని జేఎన్టీయూ సుల్తాన్‌పూర్‌ క్యాంపస్‌లో ర్యాగింగ్‌ వ్యవహారం తీవ్ర కలకలం రేపింది. విద్యార్థుల మధ్య స్నేహపూర్వక వాతావరణం ఉండాల్సిన కళాశాలలో వేధింపుల ఆరోపణలు తెరపైకి రావడంతో జూనియర్లు ఆగ్రహం వ్యక్తం చేశారు. ఈఈఈ బీటెక్‌ విద్యార్థిపై కొందరు సీనియర్లు ర్యాగింగ్‌కు పాల్పడినట్లు ఆరోపణలు రావడంతో బాధిత విద్యార్థికి మద్దతుగా జూనియర్లు ఆందోళనకు దిగారు. క్యాంపస్‌లో ర్యాగింగ్‌ను పూర్తిస్థాయిలో అరికట్టాలని, విద్యార్థులను వేధించే వారిపై కఠిన చర్యలు తీసుకోవాలని డిమాండ్‌ చేస్తూ 161 జాతీయ రహదారిపై రాస్తారోకో నిర్వహించారు. విద్యార్థులు జాతీయ రహదారిపై బైఠాయించడంతో వాహనాల రాకపోకలకు తీవ్ర అంతరాయం ఏర్పడింది. సుమారు గంటపాటు ట్రాఫిక్‌ నిలిచిపోవడంతో ప్రయాణికులు, వాహనదారులు ఇబ్బందులు ఎదుర్కొన్నారు. ర్యాగింగ్‌ పేరుతో జూనియర్‌ విద్యార్థులను మానసికంగా, శారీరకంగా వేధించడం సహించబోమని ఆందోళనకారులు స్పష్టం చేశారు. కళాశాలలో ఇలాంటి ఘటనలు పునరావృతం కాకుండా యాజమాన్యం ముందస్తు చర్యలు చేపట్టాలని కోరారు.

Read also: Patancheru Congress BRS Clash: ఎదురుదురుగా డీ కొన్న కాంగ్రెస్ VS బీఆర్ఎస్

Juniors sound the battle cry against ragging!

ఇద్దరు సీనియర్లపై సస్పెన్షన్‌!

ర్యాగింగ్‌ ఆరోపణలపై స్పందించిన జేఎన్టీయూ సుల్తాన్‌పూర్‌ యాజమాన్యం ఇద్దరు విద్యార్థులను సస్పెండ్‌ చేసినట్లు సమాచారం. విద్యార్థుల ఫిర్యాదుల నేపథ్యంలో ఘటనపై విచారణ చేపట్టి, ఆరోపణలు ఎదుర్కొంటున్న వారిపై చర్యలు తీసుకున్నట్లు తెలుస్తోంది. అయితే, కేవలం సస్పెన్షన్‌తో సమస్యకు పరిష్కారం లభించదని విద్యార్థులు అభిప్రాయపడుతున్నారు. ర్యాగింగ్‌కు పాల్పడే వారిపై కళాశాల నిబంధనల ప్రకారం కఠిన చర్యలు తీసుకోవడంతోపాటు, భవిష్యత్తులో ఇలాంటి ఘటనలు జరగకుండా పటిష్టమైన పర్యవేక్షణ ఏర్పాటు చేయాలని డిమాండ్‌ చేస్తున్నారు.

JNTU Sultanpur:స్నేహం ముసుగులో వేధింపులా?

కళాశాలల్లో సీనియర్‌, జూనియర్‌ విద్యార్థుల మధ్య పరిచయాలు, స్నేహపూర్వక సంబంధాలు విద్యార్థి జీవితంలో సహజం. అయితే, పరిచయం పేరుతో ఇబ్బందులకు గురిచేయడం, అవమానించడం, భయపెట్టడం వంటి చర్యలు ర్యాగింగ్‌ పరిధిలోకి వస్తాయని విద్యార్థులు గుర్తుచేస్తున్నారు. కొత్తగా కళాశాలలో చేరిన విద్యార్థులు ఎలాంటి భయం లేకుండా చదువుపై దృష్టి సారించే వాతావరణం కల్పించాల్సిన బాధ్యత యాజమాన్యంపై ఉందని పేర్కొంటున్నారు.

ర్యాగింగ్‌కు చెక్‌ పెట్టాలి

క్యాంపస్‌లో యాంటీ ర్యాగింగ్‌ కమిటీలను మరింత క్రియాశీలం చేయాలని, విద్యార్థుల ఫిర్యాదులపై తక్షణమే స్పందించాలని జూనియర్లు కోరుతున్నారు. బాధితులు నిర్భయంగా ఫిర్యాదు చేసే వ్యవస్థను బలోపేతం చేయాలని, ఫిర్యాదు చేసిన విద్యార్థులకు రక్షణ కల్పించాలని డిమాండ్‌ చేస్తున్నారు. ర్యాగింగ్‌ నిరోధక నిబంధనలను ప్రతి విద్యార్థికి అవగాహన కల్పిస్తూ, ఉల్లంఘనలకు పాల్పడేవారిపై నిబంధనల ప్రకారం చర్యలు తీసుకోవాలని సూచిస్తున్నారు. విద్యార్థుల భవిష్యత్తుకు విద్యాసంస్థలు భరోసా కల్పించాల్సిన అవసరం ఉందని, ర్యాగింగ్‌ రహిత క్యాంపస్‌ ఏర్పాటు దిశగా యాజమాన్యం చిత్తశుద్ధితో చర్యలు చేపట్టాలని విద్యార్థులు కోరుతున్నారు.

Epaper: epaper.vaartha.com

స్పెషల్ బస్సులు నడపాలని విద్యార్థుల ధర్నా