Revanth Reddy: తెలంగాణ రాష్ట్రం, దక్షిణాఫ్రికాల మధ్య ఆర్థిక, వాణిజ్య బంధాన్ని మరింత ఉన్నత స్థాయికి తీసుకెళ్లేలా బుధవారం హైదరాబాద్‌లో ఒక కీలక సమావేశం జరిగింది.

హైదరాబాద్‌లోని ఎంసీఆర్ హెచ్‌ఆర్‌డీ ఇన్‌స్టిట్యూట్ వేదికగా ముఖ్యమంత్రి రేవంత్ రెడ్డితో దక్షిణాఫ్రికా డిప్యూటీ ప్రెసిడెంట్ షిపోకోసా పౌలస్ మషాటిలే నేతృత్వంలోని ఉన్నత స్థాయి ప్రతినిధి బృందం ప్రత్యేకంగా భేటీ అయింది. ఈ ద్వైపాక్షిక సమావేశంలో ఇరు దేశాలు/రాష్ట్రాల మధ్య ఉన్న విభిన్న వ్యాపార, పెట్టుబడి అవకాశాలపై సుదీర్ఘంగా చర్చించారు.

Read also: Harish Rao Birthday Celebrations: మాజీ మంత్రి, ఎమ్మెల్యే హరీష్ రావు పుట్టినరోజున రక్తదాన శిబిరం

ఐటీ, ఫార్మా, గ్రీన్ ఎనర్జీ రంగాల్లో పెట్టుబడులపై కీలక చర్చలు

ప్రధానంగా ఇన్ఫర్మేషన్ టెక్నాలజీ (ఐటీ), ఫార్మాస్యూటికల్స్, పునరుత్పాదక ఇంధనం (గ్రీన్ ఎనర్జీ), విద్య, నైపుణ్యాభివృద్ధి మరియు మెడికల్ టూరిజం వంటి భవిష్యత్తు రంగాలలో పరస్పర సహకారంపై ఇరుపక్షాలు సానుకూల వ్యూహాలను పంచుకున్నాయి. ఈ సందర్భంగా ముఖ్యమంత్రి రేవంత్ రెడ్డి మాట్లాడుతూ.. తెలంగాణలో పెట్టుబడులు పెట్టేందుకు ముందుకు వచ్చే దక్షిణాఫ్రికా పారిశ్రామికవేత్తలకు, సంస్థలకు ప్రభుత్వం తరఫున పూర్తి స్థాయి ప్రోత్సాహం, సహాయ సహకారాలు అందిస్తామని స్పష్టమైన హామీ ఇచ్చారు.

Revanth Reddy: హైదరాబాద్ అంతర్జాతీయ మెడికల్ హబ్: రేవంత్ రెడ్డి

గ్లోబల్ కేపబిలిటీ సెంటర్లకు (GCC) హైదరాబాద్ నేడు ప్రధాన చిరునామాగా మారిందని దక్షిణాఫ్రికా బృందానికి ముఖ్యమంత్రి వివరించారు. అలాగే అంతర్జాతీయ ప్రమాణాలతో కూడిన మెడికల్ హబ్‌గా హైదరాబాద్ అభివృద్ధి చెందిందని, ప్రపంచ స్థాయి వైద్య సదుపాయాలు ఇక్కడ అందుబాటులో ఉన్నాయని పేర్కొన్నారు. ఇదే క్రమంలో ఈ ఏడాది డిసెంబర్ నెలలో నిర్వహించ తలపెట్టిన ప్రతిష్ఠాత్మక ‘తెలంగాణ రైజింగ్ గ్లోబల్ సమ్మిట్’కు హాజరు కావాల్సిందిగా దక్షిణాఫ్రికా ప్రతినిధి బృందాన్ని సీఎం రేవంత్ రెడ్డి అధికారికంగా ఆహ్వానించారు. ఈ ఉన్నత స్థాయి సమావేశంలో రాష్ట్ర మంత్రులు దుద్దిళ్ల శ్రీధర్ బాబు, దామోదర రాజనరసింహ కూడా పాల్గొని కీలక సూచనలు చేశారు.