సరదా వీడియోతో మొదలైన వివాదం

Shreyas Iyer Sister : శ్రేయస్ అయ్యర్ సోదరి శ్రేష్ఠ అయ్యర్ సోషల్ మాధ్యమాల్లో తీవ్ర విమర్శలు ఎదుర్కొంటున్నారు. పంజాబ్ జట్టు ప్లేఆఫ్స్‌కు చేరుకోలేకపోవడంతో కొందరు అభిమానులు ఆమెను లక్ష్యంగా చేసుకుని ఆన్‌లైన్‌లో వేధింపులకు దిగారు.

ఈ వివాదానికి కారణమైన వీడియోను శ్రేష్ఠ కేవలం సరదా కోసం మాత్రమే రూపొందించినట్లు తెలిపారు.

కోల్‌కతా జట్టుతో జరిగిన మ్యాచ్ వర్షం కారణంగా రద్దయిన తర్వాత ఆమె ఒక చిన్న వీడియోను పంచుకున్నారు. అందులో పంజాబ్ అభిమానుల మనసు పెద్దదని, అందుకే ప్రత్యర్థి జట్టుకు ఒక పాయింట్ ఇచ్చామని సరదాగా వ్యాఖ్యానించారు. అయితే ఈ వ్యాఖ్యలు కొందరు అభిమానులకు నచ్చకపోవడంతో ఆమెపై ట్రోలింగ్ ప్రారంభమైంది. పరిస్థితి తీవ్రరూపం దాల్చడంతో ఆ వీడియోను తర్వాత తొలగించారు.

కార్యాలయానికి ఫోన్లు చేసి దూషిస్తున్నారని ఆవేదన

పంజాబ్ వరుస ఓటములతో ప్లేఆఫ్స్ రేసు నుంచి బయటపడిన తర్వాత విమర్శలు మరింత పెరిగాయి. ఈ నేపథ్యంలో శ్రేష్ఠ ఒక వీడియో విడుదల చేస్తూ తన బాధను వ్యక్తం చేశారు. తాను ఎవరినీ అవమానించే ఉద్దేశంతో ఆ వీడియో చేయలేదని, ప్రతి క్రికెటర్‌ను గౌరవిస్తానని చెప్పారు.

అయితే కొందరు వ్యక్తులు తన కార్యాలయానికి ఫోన్లు చేసి దూషణలకు పాల్పడుతున్నారని ఆమె తెలిపారు. తనతో పాటు సహోద్యోగులు, విద్యార్థులు, కుటుంబ సభ్యులనూ అసభ్యంగా మాట్లాడుతున్నారని ఆవేదన వ్యక్తం చేశారు. ఆటలో ఓటమి లేదా విజయం సహజమని, కానీ ఆటగాళ్ల కుటుంబాలను లక్ష్యంగా చేసుకోవడం తగదని ఆమె స్పష్టం చేశారు.

Read also: Murugan Ashwin: ఐపీఎల్‌కు గుడ్‌బై చెప్పిన మురుగన్ అశ్విన్

అన్నకు ఎప్పుడూ అండగా ఉంటానన్న శ్రేష్ఠ

శ్రేష్ఠ మాట్లాడుతూ తన అన్న గెలిచినా ఓడినా తాను ఎప్పుడూ అతని వెంటే ఉంటానని తెలిపారు. కుటుంబ సభ్యులపై వ్యక్తిగత దాడులు చేయడం బాధాకరమని చెప్పారు. ఈ ఘటనతో తాను మానసికంగా తీవ్రంగా కలత చెందినట్లు వెల్లడించారు.