ఉద్యోగుల భవిష్య నిధి సంస్థ (EPFO) చందాదారులకు కేంద్ర ప్రభుత్వం త్వరలోనే తీపి కబురు అందించే దిశగా అడుగులు వేస్తోంది. పెన్షనర్ల చిరకాల వాంఛ అయిన కనీస పెన్షన్ పెంపుతో పాటు, నగదు విత్‌డ్రా ప్రక్రియలో విప్లవాత్మక మార్పులు రాబోతున్నాయి.

ప్రస్తుతం ఎంప్లాయీస్ పెన్షన్ స్కీమ్ (EPS-95) కింద రిటైర్డ్ ఉద్యోగులకు అందుతున్న కనీస పెన్షన్ కేవలం రూ. 1,000 మాత్రమే ఉంది. పెరిగిన జీవన ప్రమాణాలు, నిత్యావసర ధరల దృష్ట్యా ఈ మొత్తం ఏమాత్రం సరిపోదని కార్మిక సంఘాలు సుదీర్ఘ కాలంగా ఆందోళన చేస్తున్నాయి. ఈ కనీస పెన్షన్‌ను ఏకంగా రూ. 7,500కు పెంచాలని పార్లమెంటరీ స్థాయి కమిటీ కూడా గతంలో సిఫార్సు చేసింది. ఈ నేపథ్యంలో, లక్షలాది మంది పింఛనుదారులకు ఊరటనిచ్చేలా కేంద్ర ప్రభుత్వం ఈ ప్రతిపాదనపై సానుకూల నిర్ణయం తీసుకునే అవకాశం కనిపిస్తోంది. దీనివల్ల వృద్ధాప్యంలో ఉన్న రిటైర్డ్ ఉద్యోగులకు ఆర్థిక భరోసా లభిస్తుంది.

Read Also : కులగణనపై కేంద్రం జాప్యం: ప్రధాని మోదీపై జైరాం రమేశ్ విమర్శలు

ఏటీఎంల ద్వారా పీఎఫ్ విత్‌డ్రా.. నగదు కష్టాలకు చెక్!

సాధారణంగా పీఎఫ్ ఖాతా నుంచి నగదు తీసుకోవాలంటే ఆన్‌లైన్ లేదా ఆఫ్‌లైన్ ద్వారా క్లెయిమ్ ఫారమ్ సమర్పించి, అది ఆమోదం పొందే వరకు కొన్ని రోజుల పాటు వేచి చూడాల్సి వచ్చేది. కానీ, ఇకపై ఆ అవసరం లేకుండా నేరుగా ఏటీఎం (ATM)ల ద్వారా పీఎఫ్ డబ్బును విత్‌డ్రా చేసుకునే వెసులుబాటు కల్పించాలని ఈపీఎఫ్ఓ యోచిస్తోంది. అత్యవసర పరిస్థితుల్లో చందాదారులు కార్యాలయాల చుట్టూ తిరగకుండా, తమ ఖాతాలోని నగదును తక్షణమే పొందేలా సాంకేతిక మార్పులు చేయనున్నారు. ఈ సౌకర్యం అందుబాటులోకి వస్తే పీఎఫ్ ఖాతాదారులు తమ పొదుపు మొత్తాన్ని బ్యాంక్ ఖాతాలో ఉన్న నగదు మాదిరిగానే సులువుగా వాడుకోవచ్చు.