'యంగ్ ఇండియా స్టూడెంట్ కిట్' పంపిణీ కార్యక్రమాన్ని ప్రారంభించిన సీఎం రేవంత్

Revanth Reddy: తెలంగాణలో ప్రభుత్వ పాఠశాలల విద్యార్థులకు అంతర్జాతీయ స్థాయి వసతులు కల్పించడంతో పాటు క్రీడా రంగాన్ని పరుగులు పెట్టించేందుకు రాష్ట్ర ప్రభుత్వం మరో భారీ కార్యక్రమానికి శ్రీకారం చుట్టింది.

విద్యాసంస్థల్లో చదువుతున్న పేద విద్యార్థులకు నాణ్యమైన సౌకర్యాలు అందించాలనే సంకల్పంతో తీసుకొచ్చిన ప్రతిష్ఠాత్మక 'యంగ్ ఇండియా స్టూడెంట్ కిట్' పంపిణీని ముఖ్యమంత్రి రేవంత్ రెడ్డి శుక్రవారం (జూన్ 19) హైదరాబాద్‌లోని ఎల్బీ స్టేడియంలో వైభవంగా ప్రారంభించారు. రాష్ట్ర గవర్నర్ శివ ప్రతాప్ శుక్లాతో కలిసి సీఎం రేవంత్ రెడ్డి విద్యార్థులకు ఈ కిట్లను అందజేశారు.

Telangana Sports Academies

15 వేల మంది విద్యార్థుల కోలాహలం.. ఎవరికి ఏ కిట్ ఇస్తారంటే?

ఈ చారిత్రాత్మక వేడుకకు రాష్ట్రంలోని ప్రభుత్వ బడులు, కస్తూర్బా గాంధీ బాలికా విద్యాలయాలు (కేజీబీవీలు), ప్రభుత్వ గురుకులాలు, విద్యా వసతి గృహాల నుంచి దాదాపు 15 వేల మంది విద్యార్థులు తరలివచ్చారు. విద్యార్థులు చదువుకునే విద్యాసంస్థల రకాన్ని బట్టి వారి అవసరాలకు తగినట్లుగా ఈ కిట్లను ప్రభుత్వం ప్రత్యేకంగా డిజైన్ చేసింది.

గురుకుల విద్యార్థులకు: 22 రకాల నిత్యావసర, విద్యా వస్తువులు.
హాస్టల్ విద్యార్థులకు: 10 రకాల అవసరమైన వస్తువులు.
డే స్కాలర్స్ (బడికి వచ్చి వెళ్లేవారికి): 7 రకాల విద్యా సామగ్రి.

Revanth Reddy: రూ.50.73 కోట్లతో క్రీడా విప్లవం.. జిల్లాల్లో మినీ స్టేడియాలు!

కేవలం చదువుకే పరిమితం కాకుండా క్రీడల్లోనూ తెలంగాణను నంబర్ వన్‌గా నిలబెట్టేందుకు రూ.50.73 కోట్ల విలువైన క్రీడా ప్రాజెక్టులకు గవర్నర్ ఎస్.పీ. శుక్లా, సీఎం రేవంత్ రెడ్డి శంకుస్థాపనలు మరియు ప్రారంభోత్సవాలు చేశారు. ఇందులో భాగంగా రూ.36.65 కోట్లతో పలు జిల్లాల్లో మినీ స్టేడియాల నిర్మాణం, పాత స్టేడియాల ఆధునీకరణ పనులకు పచ్చజెండా ఊపారు.

షాద్‌నగర్‌లో రూ.10 కోట్లతో నిర్మించనున్న కొత్త మినీ స్టేడియం, సంగారెడ్డిలోని డాక్టర్ బీఆర్ అంబేద్కర్ స్టేడియం ఆధునీకరణ పనులతో పాటు కామారెడ్డి, నారాయణపేట, వనపర్తి, మెదక్ జిల్లాల్లో క్రీడా వసతుల ఏర్పాటుకు పునాది వేశారు.

సరికొత్త స్పోర్ట్స్ అకాడమీలు.. డ్రగ్స్‌కు వ్యతిరేకంగా విద్యార్థుల ప్రతిజ్ఞ

నగరంలోని గచ్చిబౌలి, ఎల్బీ స్టేడియాల్లో రూ.14.08 కోట్ల వ్యయంతో బాలబాలికల కోసం ప్రత్యేక క్రీడా అకాడమీలను సీఎం ప్రారంభించారు. ఇందులో ఫిఫా-ఏఐఎఫ్ఎఫ్ తెలంగాణ టాలెంట్ అకాడమీతో పాటు అథ్లెటిక్స్, హాకీ, ఫుట్‌బాల్, హ్యాండ్‌బాల్ అకాడమీలు అందుబాటులోకి వచ్చాయి. “పేద పిల్లలకు కార్పొరేట్ స్థాయి విద్యను అందించడంతో పాటు పల్లెటూరి యువతలో దాగి ఉన్న క్రీడా నైపుణ్యాలను వెలికితీయడమే మా ప్రభుత్వ సంకల్పం.”

ఇదే వేదికపై నుంచి విద్యార్థుల ఉజ్వల భవిష్యత్తును కాపాడేందుకు, సమాజాన్ని పట్టిపీడిస్తున్న మాదకద్రవ్యాలకు వ్యతిరేకంగా (యాంటీ-డ్రగ్స్) విద్యార్థులందరితో ముఖ్యమంత్రి రేవంత్ రెడ్డి ప్రతిజ్ఞ చేయించడం విశేషం.