सिंगापूर इमिग्रेशन अधिकारी बनून केली होती फसवणूक
केंद्रीय अन्वेषण ब्युरोला (सीबीआय) दीर्घकाळापासून फरार असलेला आरोपी हरनेक सिंह याला अमेरिकेतून यशस्वीपणे भारतात परत आणण्यात मोठे यश मिळाले आहे.
तो २०१३ पासून तपास आणि खटल्यापासून फरार होता. सीबीआयने माहिती दिली की, आरोपी हरनेक सिंहविरोधात इंटरपोल रेड नोटीस आणि लुक-आउट सर्क्युलर जारी करण्यात आले होते. अमेरिकेतून त्याला भारतात पाठवण्यात आले.
नवी दिल्लीतील इंदिरा गांधी आंतरराष्ट्रीय विमानतळावर पोहोचल्यानंतर सीबीआयच्या अधिकाऱ्यांनी हरनेक सिंह याला अटक केली. त्याला लवकरच हरियाणातील पंचकुला येथील विशेष न्यायिक दंडाधिकारी न्यायालयात हजर केले जाणार आहे. सीबीआयने २०१६ मध्ये भारतीय दंड संहितेअंतर्गत कटकारस्थान, फसवणूक, बनावट कागदपत्रे तयार करणे आणि बनावट कागदपत्रांचा खरा म्हणून वापर करणे, तसेच माहिती तंत्रज्ञान कायद्यांतर्गत गुन्ह्यांसाठी गुन्हा दाखल केला होता.
तपासात समोर आले की, २०१३ मध्ये सिंगापूरमध्ये राहणाऱ्या किंवा काम करणाऱ्या भारतीय नागरिकांशी ठगांनी बनावट फोन कॉलद्वारे संपर्क साधला होता. हे आरोपी सिंगापूरच्या इमिग्रेशन अधिकाऱ्यांच्या भूमिकेतून बोलत होते. सीबीआयच्या माहितीनुसार, आरोपींनी पीडितांना चुकीची माहिती दिली होती. त्यांनी पीडितांना सांगितले की, त्यांनी विमानतळावरील डिसएम्बार्केशन फॉर्ममध्ये चुकीची माहिती भरली आहे. त्यामुळे त्यांच्यावर फौजदारी कारवाई होऊ शकते आणि त्यांना देशातून हद्दपार केले जाऊ शकते, अशी भीती दाखवण्यात आली. यानंतर आरोपींनी पीडितांना वेस्टर्न युनियन मनी ट्रान्सफरच्या माध्यमातून भारतातील ठरावीक व्यक्तींना कथित सेटलमेंट फी किंवा दंडाची रक्कम भरण्यास सांगितले.
आयफोनचा नवा अवतार! २.९९ लाखांचा फोल्डेबल 'ऍपल ड्युओ'
दुबईचा व्हिडीओ दिल्ली विमानतळाचा म्हणून पसरवला; ६३ खात्यांवर कारवाई
ब्रिक्सच्या व्यासपीठावर मोदी-जिनपिंग भेटणार! गलवाननंतर प्रथमच आमनेसामने चर्चा
अफगाण वैद्यकीय विद्यार्थ्यांना पाकिस्तान सोडण्याचे आदेश
पुढे तपासात असेही समोर आले की, फसवणुकीतून मिळालेली रक्कम हरनेक सिंहच्या माध्यमातून चालवण्यात येणाऱ्या मनी-ट्रान्सफर आउटलेटद्वारे स्वीकारली जात होती. या प्रकरणात त्याच्यासोबत सहआरोपी आदित्य भारद्वाज आणि दीपक जैन यांचाही सहभाग होता. हरनेक सिंह मे २०१३ मध्ये भारतातून फरार झाला आणि त्यानंतर बेकायदेशीर मार्गाने अमेरिकेत पोहोचला. तेथे तो दशकाहून अधिक काळ फरार राहिला. हरनेक सिंह फरार असताना सहआरोपी आदित्य भारद्वाज आणि दीपक जैन यांच्याविरोधातील खटल्याची सुनावणी संबंधित न्यायालयात पूर्ण झाली. दोघांनाही २६ मे २०२५ रोजी दोषी ठरवण्यात आले.