आरोपीने एका पोलिसाचे सर्व्हिस वेपन हिसकावून पथकावर गोळीबार करत पळून जाण्याचा प्रयत्न केल्यानंतर पोलिसांनी प्रत्युत्तरादाखल गोळीबार केला, अशी माहिती अधिकाऱ्यांनी दिली.

या प्रकरणातील पीडित १२ वर्षीय मुलगी बेपत्ता झाल्यानंतर ५ जुलै रोजी तिचा मृतदेह सूर्यपूर परिसरातील एका तलावात पोत्यात कोंबलेल्या अवस्थेत आढळला होता. शवविच्छेदन अहवालातून तिच्यावर लैंगिक अत्याचार झाल्यानंतर हत्या करण्यात आल्याचे स्पष्ट झाल्याने परिसरात संतापाची लाट उसळली होती.

पोलिसांच्या माहितीनुसार, प्रभाश मंडल हा या प्रकरणात अटक करण्यात आलेल्या तीन आरोपींपैकी एक होता. तपासादरम्यान त्याने दिलेल्या माहितीची पडताळणी करण्यासाठी आणि गुन्ह्याचा घटनाक्रम समजून घेण्यासाठी मंगळवारी पहाटे सुमारे १२.४५ वाजता त्याला बारुईपूर पोलीस ठाण्यातून सूर्यपूर येथे नेण्यात आले. घटनास्थळाची पुनर्रचना सुरू होण्यापूर्वीच मंडलने एका पोलिस कर्मचाऱ्याचे सर्व्हिस वेपन हिसकावून घेतले. त्याने पोलिसांवर गोळीबार करून पळून जाण्याचा प्रयत्न केला. त्यानंतर पोलिसांनी स्वसंरक्षणार्थ गोळीबार केला. या गोळीबारात मंडल गंभीर जखमी झाला. त्याला तातडीने बारुईपूर रुग्णालयात दाखल करण्यात आले; मात्र डॉक्टरांनी त्याला मृत घोषित केले.

१२ वर्षीय मुलीचा मृतदेह सापडल्यानंतर स्थानिक नागरिक संतप्त झाले. पोलिसांनी तातडीने कारवाई केली नाही, असा आरोप करत नागरिकांनी बारुईपूर-जयनगर मार्ग रोखून धरला. आंदोलकांनी टायर जाळले, पोलिसांच्या वाहनांची तोडफोड केली आणि निषेध आंदोलन छेडले. या आंदोलनादरम्यान आणखी एक धक्कादायक घटना घडली. इंद्रजित मंडल या व्यक्तीचा गुन्ह्यात सहभाग असल्याचा संशय घेत संतप्त जमावाने त्याला बेदम मारहाण केली. या मारहाणीत त्याचा मृत्यू झाला.

'केवळ मुंबई महानगरपालिकेला दोष देता येणार नाही, नागरिकही जबाबदार'

महाराष्ट्रात पुन्हा मुसळधार; अनेक जिल्ह्यांना रेड अलर्ट

इराणला तेलविक्रीवर दिलेली सूट रद्द; होर्मुझ हल्ल्याचा दणका

बिश्नोई टोळीवर निज्जरच्या हत्येचा आदेश दिल्याचा आरोप

घटनेनंतर पोलिसांनी तपासात इंद्रजित मंडलचा बलात्कार आणि हत्येशी कोणताही संबंध नसल्याचे स्पष्ट केले. चुकीच्या संशयातून त्याचा जमावाकडून बळी गेल्याचे तपासात समोर आले आहे. या प्रकरणी पोलिसांनी आतापर्यंत तीन जणांना अटक केली असून, जमावाच्या हल्ल्यात सहभागी झालेल्या इतर आरोपींचा शोध सुरू आहे. इंद्रजित मंडलच्या हत्येप्रकरणी संबंधितांवर खुनाचा गुन्हा दाखल करण्यात येणार असल्याचे पोलिसांनी सांगितले.

बलात्कार आणि हत्या प्रकरणाचा सखोल तपास करण्यासाठी सहा सदस्यीय विशेष तपास पथक (SIT) स्थापन करण्यात आले आहे. या पथकाकडून वैज्ञानिक पुरावे, सीसीटीव्ही फुटेज, फॉरेन्सिक अहवाल आणि आरोपींची चौकशी यावर भर दिला जात आहे. वाढत्या जनक्षोभाच्या पार्श्वभूमीवर पश्चिम बंगालचे मुख्यमंत्री यांनी पोलीस महासंचालकांना या संपूर्ण प्रकरणाचा ७२ तासांच्या आत सविस्तर अहवाल सादर करण्याचे निर्देश दिले आहेत.