या प्रकरणी पोलिसांनी गुन्हा दाखल केला असून, आरोपीला बेड्या ठोकल्या आहेत.

शुभम जगताप असे अटक केलेल्या आरोपीचे नाव आहे. या घटनेत विजय गेहलोत हे ६० टक्के भाजले आहेत. मिळालेल्या माहितीनुसार, गेहलोत हे नाशिकच्या ठक्कर बस स्थानक परिसरात सुरक्षा रक्षक आणि स्वच्छता कर्मचारी म्हणून काम करतात. आरोपी शुभम याला दारुचे व्यसन आहे. तो अनेकदा दारु पिऊन बस स्थानक परिसरात यायचा. गेहलोत यांनी शुभमला हटकलं. तू दारू पिऊन या परिसरात येऊ नको, असे सांगितले. याचाच राग शुभमला आला. त्यामुळे त्याने थेट सुरक्षारक्षक असलेल्या गेहलोत यांना जीवे मारण्याचा कट रचला.

घटनेच्या दिवशी तो एका बाटलीत पॅट्रोल घेऊन बस स्थानकावर आला. त्यांनी अचानक हॅप्पी होली म्हणत गेहलोत यांच्या अंगावर पेट्रोल टाकले आणि काही कळायच्या आत गेहलोत यांच्या अंगाला आग लावली. या घटनेत गेहलोत ६० टक्के भाजले आहेत. त्यांच्यावर स्थानिक रुग्णालयात उपचार सुरू आहेत. या प्रकरणी पोलिसांनी आरोपी शुभमवर विविध कलमांतर्गत गुन्हा दाखल केला असून त्याला अटक केली आहे. पोलिस पुढील तपास करत आहेत.