అప్పట్లో 'నన్నెవరూ అభిమానించకండి.. మీ అమ్మనాన్నలను అభిమానించండి' అంటూ కోలీవుడ్ స్టార్ హీరో అజిత్ కుమార్ (Ajith Kumar) ఓపెన్ స్టేట్‌మెంట్ ఇచ్చారు. అప్పటి నుంచి తనకసలు అభిమానులే లేరనేలా ఆయన ప్రవర్తిస్తుంటారు. సరే, ఆ విషయం పక్కన పెడితే.. ఇప్పుడు నటుడు, కొరియోగ్రాఫర్, దర్శకుడు రాఘవ లారెన్స్‌ (Raghava Lawrence)ను ఓ అభిమాని వార్తల్లో నిలిచేలా చేసి, ఇరకాటంలో పెట్టేశాడు. నిజంగా ఆ అభిమాని ఏం చేశాడో తెలిస్తే అంతా షాకవుతారు.

ఇటీవల రాఘవ లారెన్స్ పొలిటికల్ ఎంట్రీకి సంబంధించి ఎలా వార్తలు వైరల్ అవుతున్నాయో తెలియంది కాదు. ఆయనే స్వయంగా మీడియా సమావేశం నిర్వహించి వివరణ ఇచ్చేంత వరకు వెళ్లింది అంటే.. త్వరలోనే ఆయన ఎంట్రీ ఉంటుందని అంతా ఫిక్సయ్యారు. లారెన్స్ మీటింగ్ పెట్టి.. సమయం వచ్చినప్పుడు తప్పకుండా వస్తానని అలా చెప్పాడో లేదో.. ఓ అభిమాని.. ఏకంగా ఆయనని తమిళనాడుకు డిప్యూటీ సీఎంని చేసేశాడు. అవును, లారెన్స్ కుర్చీలో కూర్చుని ఉండగా, ఎదురు నేమ్ బోర్డు మీద 'రాఘవ లారెన్స్ డిప్యూటీ చీఫ్ మినిస్టర్ - తమిళనాడు' అని రాసి ఉన్న ఫొటోని సోషల్ మీడియాలో షేర్ చేశాడు. ఈ ఫొటోని ఏఐలో చేసినప్పటికీ ఒరిజినలా! అనేలానే ఉండటం విశేషం.

సీఎం విజయ్ (CM Vijay) రాజీనామా చేసిన తిరుచ్చి ఈస్ట్ నియోజకవర్గం నుంచి లారెన్స్ పోటీ చేయబోతున్నట్లుగా తమిళనాట వార్తలు వైరల్ అవుతున్న నేపథ్యంలో.. ఈ ఫొటో అక్కడి రాజకీయాలను మరింత వేడెక్కించింది. ఇది లారెన్స్ అఫీషియల్ అకౌంట్ నుంచి పోస్ట్ అయినట్లుగా ఉండటంతో.. ఒక్కసారిగా ఈ పోస్ట్‌పై చర్చలు మొదలయ్యాయి. ఇదేంటి? అక్కడేం లేకుండానే లారెన్స్ ఇలా చేశాడంటూ విమర్శలు సైతం మొదలయ్యాయి. తీరా చూస్తే.. అది లారెన్స్ అకౌంట్ కాదని, ఆయన అభిమాని రన్ చేస్తున్న అకౌంట్ అని తెలిసే టైమ్‌కే జరగాల్సిన డ్యామేజ్ జరిగిపోయింది.