150ಕ್ಕೂ ಹೆಚ್ಚು ಭಾಷಣಕಾರರು, 50ಕ್ಕೂ ಹೆಚ್ಚು ಪ್ರದರ್ಶಕರು ಹಾಗೂ ನಾಲ್ಕು ವಿಷಯಾಧಾರಿತ ಗೋಷ್ಠಿಗಳು ಇರಲಿವೆ. ಕರ್ನಾಟಕದ ಕೌಶಲ ಅಭಿವೃದ್ಧಿ ವ್ಯವಸ್ಥೆಯನ್ನು ಮುಂದಿನ ಹಂತಕ್ಕೆ ಕೊಂಡೊಯ್ಯುವ ಉದ್ದೇಶವನ್ನು ಈ ಸಮಾವೇಶ ಹೊಂದಿದೆ.

ಆದರೆ, ಇಂತಹ ಸಮಾವೇಶಗಳು ಘೋಷಣೆಗಳನ್ನು ಮಾಡುತ್ತವೆಯೇ ಹೊರತು ಉದ್ಯೋಗಗಳನ್ನು ಸೃಷ್ಟಿಸುವುದಿಲ್ಲ. ಕರ್ನಾಟಕದ ಕೌಶಲ ಅಭಿವೃದ್ಧಿಯ ಸಮಸ್ಯೆ ಕೇವಲ ಸಮಾವೇಶಗಳಿಂದ ಪರಿಹರಿಸುವಂಥದ್ದಲ್ಲ. ಅದು ವ್ಯವಸ್ಥೆಯಲ್ಲೇ ಬೇರೂರಿರುವ ಸಮಸ್ಯೆ. ಇದಕ್ಕೆ ಪರಿಹಾರ ಕಂಡುಕೊಳ್ಳಲು ಸಮಾವೇಶದ ಬಳಿಕವೂ ಸರ್ಕಾರ ಶಾಸನಬದ್ಧ ಕ್ರಮಗಳನ್ನು ಕೈಗೊಳ್ಳಬೇಕಿದೆ.

ಐಟಿಐ ವ್ಯವಸ್ಥೆಯ ವಾಸ್ತವ ಸ್ಥಿತಿ

ಕರ್ನಾಟಕವು ದೇಶದಲ್ಲೇ ಅತಿ ದೊಡ್ಡ ಕೈಗಾರಿಕಾ ತರಬೇತಿ ಸಂಸ್ಥೆಗಳ (ಐಟಿಐ) ಜಾಲ ಹೊಂದಿದೆ. ರಾಜ್ಯದಲ್ಲಿ 270 ಸರ್ಕಾರಿ ಐಟಿಐಗಳು ಸೇರಿದಂತೆ ಒಟ್ಟು 462 ಐಟಿಐಗಳಿವೆ. ಆದರೆ, ಸಂಸ್ಥೆಗಳ ಸಂಖ್ಯೆಯೇ ಅವುಗಳ ಸಾಮರ್ಥ್ಯವನ್ನು ತೋರಿಸುವುದಿಲ್ಲ. 2026ರ ವರದಿಯೊಂದರ ಪ್ರಕಾರ, ರಾಜ್ಯದಲ್ಲಿ ಸುಮಾರು ಅರ್ಧದಷ್ಟು ತರಬೇತುದಾರರ ಹುದ್ದೆಗಳು ಖಾಲಿ ಇವೆ. ನೋಂದಾಯಿತ ಉದ್ಯಮಗಳ ಪೈಕಿ ನಾಲ್ಕರಲ್ಲಿ ಒಂದು ಮಾತ್ರ ಶಿಷ್ಯವೃತ್ತಿ ತರಬೇತಿ ನೀಡುತ್ತಿದೆ. ಪರಿಣಾಮವಾಗಿ, ಹಲವು ಜಿಲ್ಲೆಗಳ ಐಟಿಐ ವಿದ್ಯಾರ್ಥಿಗಳು ಅಗತ್ಯ ಕೌಶಲಗಳ ತರಬೇತಿ ಮತ್ತು ಪ್ರಾಯೋಗಿಕ ಅನುಭವವಿಲ್ಲದೆ ಶಿಕ್ಷಣ ಮುಗಿಸಿ ಹೊರಬರುತ್ತಿದ್ದಾರೆ. ಬಾಗಲಕೋಟೆ, ಬೀದರ್, ಚಿಕ್ಕಮಗಳೂರು, ದಾವಣಗೆರೆ, ಕಲಬುರಗಿ, ಕೊಡಗು, ರಾಯಚೂರು, ವಿಜಯನಗರ ಮತ್ತು ವಿಜಯಪುರ ಜಿಲ್ಲೆಗಳಲ್ಲಿ ಈ ಸಮಸ್ಯೆ ಕಂಡುಬಂದಿದೆ.

ಇದಕ್ಕೆ ವ್ಯತಿರಿಕ್ತವಾಗಿ, ಉದ್ಯಮಗಳ ಸಹಭಾಗಿತ್ವದಲ್ಲಿ ನಡೆಯುವ ಐಟಿಐಗಳು ಉತ್ತಮ ಫಲಿತಾಂಶ ನೀಡುತ್ತಿವೆ. ಇಂತಹ ಕೆಲವು ಸಂಸ್ಥೆಗಳಲ್ಲಿ ಶೇ 70ಕ್ಕೂ ಹೆಚ್ಚು ವಿದ್ಯಾರ್ಥಿಗಳಿಗೆ ಉದ್ಯೋಗ ದೊರೆಯುತ್ತಿದೆ. ಇದು ಉದ್ಯಮಗಳ ಅಗತ್ಯಕ್ಕೆ ತಕ್ಕ ಕೌಶಲ ತರಬೇತಿ ಪಡೆಯದ ಪದವಿ ಮತ್ತು ಡಿಪ್ಲೊಮಾ ವಿದ್ಯಾರ್ಥಿಗಳ ಉದ್ಯೋಗಾವಕಾಶಗಳಿಗಿಂತ ಉತ್ತಮವಾಗಿದೆ. ಆದರೆ, ಸಾಮಾನ್ಯ ಐಟಿಐಗಳಲ್ಲಿ ಉದ್ಯೋಗ ಪಡೆಯುವವರ ಪ್ರಮಾಣ ಶೇ 30ರಿಂದ 40ರಷ್ಟಿದೆ. ಈ ವ್ಯತ್ಯಾಸವು ಐಟಿಐಗಳ ಪಠ್ಯಕ್ರಮಕ್ಕೂ ಉದ್ಯಮಗಳ ನೈಜ ಅಗತ್ಯಗಳಿಗೂ ನಡುವೆ ಇರುವ ಅಂತರವನ್ನು ಸ್ಪಷ್ಟಪಡಿಸುತ್ತದೆ.

ಪಿಎಂ-ಸೇತು ಯೋಜನೆಯ ಅವಕಾಶ ಮತ್ತು ಮಿತಿಗಳು

ಐಟಿಐಗಳ ತರಬೇತಿ ಮತ್ತು ಉದ್ಯಮಗಳ ಅಗತ್ಯಗಳ ನಡುವಿನ ಅಂತರವನ್ನು ಕಡಿಮೆ ಮಾಡುವ ಉದ್ದೇಶದಿಂದ ಕೇಂದ್ರ ಸರ್ಕಾರ ₹60,000 ಕೋಟಿ ಮೊತ್ತದ ಪ್ರಧಾನ ಮಂತ್ರಿ ಕೌಶಲ ಮತ್ತು ಉದ್ಯೋಗಾರ್ಹತೆ ಪರಿವರ್ತನೆ ಯೋಜನೆ (ಪಿಎಂ-ಸೇತು) ಜಾರಿಗೆ ತಂದಿದೆ. ಈ ಯೋಜನೆಯಡಿ ದೇಶದಾದ್ಯಂತ 1,000 ಸರ್ಕಾರಿ ಐಟಿಐಗಳನ್ನು ಉನ್ನತೀಕರಿಸಲಾಗುತ್ತಿದೆ. ಕರ್ನಾಟಕದಲ್ಲಿ 12 ಹಬ್‌ಗಳ ಮೂಲಕ 48 ಐಟಿಐಗಳನ್ನು ಉನ್ನತೀಕರಿಸಲಾಗುತ್ತಿದೆ. ಇದಕ್ಕಾಗಿ ಒಟ್ಟು ₹241 ಕೋಟಿ ಹೂಡಿಕೆ ಮಾಡಲಾಗುತ್ತಿದ್ದು, ಕೇಂದ್ರ ಸರ್ಕಾರ ₹112 ಕೋಟಿ, ರಾಜ್ಯ ಸರ್ಕಾರ ₹98 ಕೋಟಿ ಮತ್ತು ಉದ್ಯಮ ವಲಯ ₹31 ಕೋಟಿ ನೀಡಲಿವೆ. ಬೆಂಗಳೂರು ನಗರ ಮತ್ತು ಕಲಬುರಗಿ ಜಿಲ್ಲೆಗಳಲ್ಲಿ ತಲಾ ಒಂದು ಹಬ್ ಸ್ಥಾಪಿಸಲು ಆಯ್ಕೆ ಮಾಡಲಾಗಿದೆ.

ಪಿಎಂ-ಸೇತು ಯೋಜನೆಯ ಪ್ರಮುಖ ವಿಶೇಷತೆಯೆಂದರೆ, ಇದರ ನಿರ್ವಹಣೆಯ ಜವಾಬ್ದಾರಿಯನ್ನು ಉದ್ಯಮಗಳಿಗೂ ನೀಡಿರುವುದು. ಉನ್ನತೀಕರಿಸಲಾದ ಪ್ರತಿಯೊಂದು ಐಟಿಐಯ ನಿರ್ವಹಣೆಗೆ ವಿಶೇಷ ಉದ್ದೇಶದ ಸಂಸ್ಥೆ (ಎಸ್‌ಪಿವಿ) ರಚಿಸಲಾಗುತ್ತದೆ. ಇದರಲ್ಲಿ ಉದ್ಯಮದ ಪ್ರತಿನಿಧಿಗಳು ಶೇ 51ರಷ್ಟು ಮತ್ತು ಸರ್ಕಾರ ಶೇ 49ರಷ್ಟು ಪಾಲು ಹೊಂದಿರುತ್ತಾರೆ. ಇದರ ಮೂಲಕ ಪಠ್ಯಕ್ರಮ ರೂಪಿಸುವುದು, ತರಬೇತಿ ಕಾರ್ಯಕ್ರಮಗಳನ್ನು ಸಿದ್ಧಪಡಿಸುವುದು ಮತ್ತು ಕೌಶಲ ಅಭಿವೃದ್ಧಿಯ ಚೌಕಟ್ಟನ್ನು ನಿರ್ಧರಿಸುವಲ್ಲಿ ಉದ್ಯಮಗಳಿಗೆ ಪ್ರಮುಖ ಪಾತ್ರ ವಹಿಸಲು ಅವಕಾಶ ಕಲ್ಪಿಸಲಾಗಿದೆ.

ಇದು ಸ್ವಾಗತಾರ್ಹ ಬೆಳವಣಿಗೆಯಾದರೂ, ಒಂದು ಮೂಲಭೂತ ಸಮಸ್ಯೆ ಇನ್ನೂ ಉಳಿದಿದೆ. ಪಿಎಂ-ಸೇತು ಯೋಜನೆಯಲ್ಲಿ ಉದ್ಯಮಗಳು ಸ್ವಯಂಪ್ರೇರಣೆಯಿಂದ ಮಾತ್ರ ಪಾಲ್ಗೊಳ್ಳಬಹುದು. ವಾರ್ಷಿಕ ₹500 ಕೋಟಿ ವಹಿವಾಟು ಹೊಂದಿರುವ ಮತ್ತು 1,000ಕ್ಕೂ ಹೆಚ್ಚು ಉದ್ಯೋಗಿಗಳನ್ನು ಹೊಂದಿರುವ ಕಂಪನಿಗಳು ಮಾತ್ರ ಈ ಯೋಜನೆಯಲ್ಲಿ ಪಾಲ್ಗೊಳ್ಳಲು ಅರ್ಹವಾಗಿವೆ. ಕರ್ನಾಟಕದ 270 ಸರ್ಕಾರಿ ಐಟಿಐಗಳ ಪೈಕಿ 48 ಮಾತ್ರ ಪಿಎಂ-ಸೇತು ಯೋಜನೆಯ ವ್ಯಾಪ್ತಿಗೆ ಬರುತ್ತವೆ. ಹಾಗಾದರೆ ಉಳಿದ 222 ಐಟಿಐಗಳ ಸ್ಥಿತಿ ಏನು? ಅವುಗಳಿಗೆ ಉದ್ಯಮಗಳೊಂದಿಗೆ ಸಂಪರ್ಕ ಕಲ್ಪಿಸುವುದನ್ನು ಕಡ್ಡಾಯಗೊಳಿಸುವ ಯಾವುದೇ ಶಾಸನಬದ್ಧ ಆದೇಶವಿಲ್ಲ.

ಶಾಸನಬದ್ಧ ಅಧಿಕಾರ ಏಕೆ ಬೇಕು?

ಇಲ್ಲಿ ಒಂದು ಪ್ರಮುಖ ಪ್ರಶ್ನೆ ಎದುರಾಗುತ್ತದೆ. ಐಟಿಐಗಳ ಪಠ್ಯಕ್ರಮವನ್ನು ಉದ್ಯಮಗಳೇ ರೂಪಿಸಬೇಕು ಎಂದು ನಾವು ಏಕೆ ಒತ್ತಾಯಿಸುತ್ತಿದ್ದೇವೆ? ಏಕೆಂದರೆ ಉದ್ಯಮಗಳಿಗೆ ನಿರ್ದಿಷ್ಟ ಕೌಶಲಗಳನ್ನು ಹೊಂದಿರುವ ಉದ್ಯೋಗಿಗಳ ಅಗತ್ಯವಿದೆ. ಹಾಗಾದರೆ, ಉದ್ಯಮಗಳ ಈ ಅಗತ್ಯಕ್ಕೆ ತಕ್ಕಂತೆ ವಿದ್ಯಾರ್ಥಿಗಳಿಗೆ ತರಬೇತಿ ನೀಡುವ ಜವಾಬ್ದಾರಿ ಯಾರದ್ದು? ಪ್ರಸ್ತುತ ವ್ಯವಸ್ಥೆಯಲ್ಲಿ ಈ ಜವಾಬ್ದಾರಿಯನ್ನು ಹೊರುವವರು ಯಾರೂ ಇಲ್ಲ. ಐಟಿಐಗಳ ಪಠ್ಯಕ್ರಮವನ್ನು ತರಬೇತಿ ಮಹಾನಿರ್ದೇಶನಾಲಯ (ಡಿಜಿಟಿ) ನಿರ್ಧರಿಸುತ್ತದೆ. ಉದ್ಯಮಗಳು ತಮಗೆ ಬೇಕಾದ ಕೌಶಲಗಳ ಬಗ್ಗೆ ಮಾಹಿತಿ ನೀಡುತ್ತವೆ. ಆದರೆ ಆ ಅಗತ್ಯಗಳಿಗೆ ತಕ್ಕಂತೆ ತರಬೇತಿ ನೀಡದಿದ್ದರೂ ಸಂಬಂಧಪಟ್ಟವರನ್ನು ಹೊಣೆಗಾರರನ್ನಾಗಿ ಮಾಡುವ ಅಥವಾ ಕ್ರಮ ಕೈಗೊಳ್ಳುವ ವ್ಯವಸ್ಥೆ ಇಲ್ಲ.

ಈ ಪರಿಸ್ಥಿತಿಯನ್ನು ಬದಲಾಯಿಸಲು ಕರ್ನಾಟಕವು ಶಾಸನಬದ್ಧ ಕೌಶಲ ಮಂಡಳಿಯೊಂದನ್ನು ರಚಿಸಬೇಕು. ಈ ಮಂಡಳಿಯು ಪ್ರತಿ ಜಿಲ್ಲೆಯ ಐಟಿಐಗಳ ಪಠ್ಯಕ್ರಮವನ್ನು ಆಯಾ ಜಿಲ್ಲೆಯಲ್ಲಿ ಕಾರ್ಯನಿರ್ವಹಿಸುವ ಉದ್ಯಮಗಳ ಅಗತ್ಯಗಳಿಗೆ ಅನುಗುಣವಾಗಿ ರೂಪಿಸುವುದನ್ನು ಖಚಿತಪಡಿಸಬೇಕು. ಉದಾಹರಣೆಗೆ, ಕಲಬುರಗಿ ಜಿಲ್ಲೆಯಲ್ಲಿ ಲಾಜಿಸ್ಟಿಕ್ಸ್ ಪಾರ್ಕ್ ಅಥವಾ ಸೌರ ವಿದ್ಯುತ್ ಘಟಕ ಸ್ಥಾಪನೆಯಾದರೆ, ಅಲ್ಲಿನ ಐಟಿಐಗಳು ಆ ಘಟಕಗಳಿಗೆ ಅಗತ್ಯವಿರುವ ಕೌಶಲಗಳಿಗೆ ತಕ್ಕಂತೆ ವಿದ್ಯಾರ್ಥಿಗಳಿಗೆ ತರಬೇತಿ ನೀಡಬೇಕು. ಇದನ್ನು ಕಡ್ಡಾಯಗೊಳಿಸದಿದ್ದರೆ, ಐಟಿಐಗಳು ಹಳೆಯ ಪಠ್ಯಕ್ರಮವನ್ನೇ ಮುಂದುವರಿಸುತ್ತವೆ. ಮತ್ತೊಂದೆಡೆ, ಉದ್ಯಮಗಳು ಸ್ಥಳೀಯವಾಗಿ ತರಬೇತಿ ಪಡೆದ ಕಾರ್ಮಿಕರು ಸಿಗದೆ ಹೊರಗಿನಿಂದ ಕೆಲಸಗಾರರನ್ನು ಕರೆತರುವ ಪರಿಸ್ಥಿತಿ ಮುಂದುವರಿಯುತ್ತದೆ.

ಈ ನಿಟ್ಟಿನಲ್ಲಿ ಒಂದು ಸಕಾರಾತ್ಮಕ ಬೆಳವಣಿಗೆಯೂ ಇದೆ. ಕರ್ನಾಟಕ ಸರ್ಕಾರವು ವಿಧಾನಸಭೆಯ ಚಳಿಗಾಲದ ಅಧಿವೇಶನದಲ್ಲಿ ಶಿಷ್ಯವೃತ್ತಿ (ಅಪ್ರೆಂಟಿಸ್) ತಿದ್ದುಪಡಿ ಮಸೂದೆಯನ್ನು ಮಂಡಿಸಲು ಸಿದ್ಧತೆ ನಡೆಸಿದೆ. ಈ ಮಸೂದೆಯು ಉದ್ಯಮಗಳಲ್ಲಿ ಶಿಷ್ಯವೃತ್ತಿ ತರಬೇತಿ ಪಡೆಯುವವರ ಪ್ರಮಾಣವನ್ನು ಒಟ್ಟು ಕಾರ್ಮಿಕರ ಸಂಖ್ಯೆಯ ಶೇ 15ರಿಂದ ಶೇ 25ಕ್ಕೆ ಹೆಚ್ಚಿಸಲು ಪ್ರಸ್ತಾಪಿಸಿದೆ. ಅಂದರೆ, ಶೇ 10ರಷ್ಟು ಹೆಚ್ಚಳಕ್ಕೆ ಉದ್ದೇಶಿಸಲಾಗಿದೆ. ಇದು ಸ್ವಾಗತಾರ್ಹ ಕ್ರಮ. ಆದರೆ, ಈ ಮಸೂದೆಯ ವ್ಯಾಪ್ತಿ ಶಿಷ್ಯವೃತ್ತಿಗೆ ಮಾತ್ರ ಸೀಮಿತವಾಗಿದೆ. ಐಟಿಐಗಳ ಪಠ್ಯಕ್ರಮವನ್ನು ಉದ್ಯಮಗಳ ಅಗತ್ಯಗಳಿಗೆ ಅನುಗುಣವಾಗಿ ರೂಪಿಸಬೇಕು ಎಂಬುದನ್ನು ಕಡ್ಡಾಯಗೊಳಿಸುವ ಯಾವುದೇ ಶಾಸನಬದ್ಧ ಆದೇಶ ಇದರಲ್ಲಿ ಇಲ್ಲ.

ಮುಂದಿನ ಹೆಜ್ಜೆ

ಬೆಂಗಳೂರು ಸ್ಕಿಲ್ ಸಮಿಟ್ 2026ರ ನಾಲ್ಕು ಪ್ರಮುಖ ವಿಷಯಗಳಲ್ಲಿ 'ಎಲ್ಲರಿಗೂ ಕೌಶಲ' (ಸ್ಕಿಲ್ಸ್ ಫಾರ್ ಆಲ್) ಕೂಡ ಒಂದು. ಈ ವಿಭಾಗದಲ್ಲಿ ಅಸಂಘಟಿತ ವಲಯದ ಕಾರ್ಮಿಕರು ಮತ್ತು ಗಿಗ್ ಆರ್ಥಿಕತೆಯ ಬಗ್ಗೆಯೂ ಚರ್ಚಿಸಲಾಗುತ್ತದೆ. ಇವುಗಳತ್ತ ಗಮನ ಹರಿಸಿರುವುದು ಸೂಕ್ತ. ಆದರೆ, ಶೃಂಗಸಭೆಯಲ್ಲಿ ಮಾಡಿದ ಘೋಷಣೆಗಳು ಕೇವಲ ಕಾಗದಕ್ಕೆ ಸೀಮಿತವಾಗಬಾರದು ಎಂದಾದರೆ, ಕರ್ನಾಟಕ ಸರ್ಕಾರ ಮೂರು ನಿರ್ದಿಷ್ಟ ಕ್ರಮಗಳನ್ನು ಕೈಗೊಳ್ಳಬೇಕು.

ಮೊದಲನೆಯದಾಗಿ, ಪ್ರತಿ ಜಿಲ್ಲೆಯ ಐಟಿಐಯನ್ನು ಅಲ್ಲಿನ ಪ್ರಮುಖ ಉದ್ಯಮಗಳೊಂದಿಗೆ ಕಾನೂನುಬದ್ಧವಾಗಿ ಜೋಡಿಸುವ ಶಾಸನವನ್ನು ರೂಪಿಸಬೇಕು. ಈ ಸಂಬಂಧ ಕೇವಲ ಉದ್ಯಮಗಳ ಸ್ವಯಂಪ್ರೇರಿತ ಆಸಕ್ತಿಗೆ ಸೀಮಿತವಾಗಬಾರದು. ಉದ್ಯಮಗಳು ಐಟಿಐಗಳ ಪಠ್ಯಕ್ರಮ ರೂಪಿಸುವಲ್ಲಿ ಭಾಗವಹಿಸುವುದರ ಜೊತೆಗೆ, ಆ ಪಠ್ಯಕ್ರಮದಡಿ ತರಬೇತಿ ಪಡೆದು ತೇರ್ಗಡೆಯಾದ ವಿದ್ಯಾರ್ಥಿಗಳಿಗೆ ಉದ್ಯೋಗಾವಕಾಶ ಕಲ್ಪಿಸುವ ಬದ್ಧತೆಯನ್ನೂ ಹೊಂದಿರಬೇಕು.

ಎರಡನೆಯದಾಗಿ, ಐಟಿಐಗಳಲ್ಲಿ ತರಬೇತುದಾರರ ಕೊರತೆಯನ್ನು ನೀಗಿಸಬೇಕು. ಅರ್ಧದಷ್ಟು ಹುದ್ದೆಗಳು ಖಾಲಿ ಇರುವಾಗ, ಉತ್ತಮ ಪಠ್ಯಕ್ರಮವಿದ್ದರೂ ನಿರೀಕ್ಷಿತ ಫಲಿತಾಂಶ ಪಡೆಯಲು ಸಾಧ್ಯವಿಲ್ಲ. ಆದ್ದರಿಂದ, ಉದ್ಯಮ ವಲಯದ ತಜ್ಞರನ್ನು ಅರೆಕಾಲಿಕ ತರಬೇತುದಾರರಾಗಿ ನೇಮಿಸಿಕೊಳ್ಳಲು ಪ್ರತ್ಯೇಕ ವೇತನ ವ್ಯವಸ್ಥೆ ಮತ್ತು ಅರ್ಹತಾ ಮಾನದಂಡಗಳನ್ನು ರೂಪಿಸಬೇಕು.

ಮೂರನೆಯದಾಗಿ, ಐಟಿಐಗಳ ಉದ್ಯೋಗ ನೇಮಕಾತಿ ಪ್ರಮಾಣವನ್ನು ಸಾರ್ವಜನಿಕವಾಗಿ ಪ್ರಕಟಿಸುವುದನ್ನು ಕಡ್ಡಾಯಗೊಳಿಸಬೇಕು. ಪ್ರಸ್ತುತ, ಕೆಲವು ಐಟಿಐಗಳಲ್ಲಿ ಶೇ 70ರಷ್ಟು ವಿದ್ಯಾರ್ಥಿಗಳಿಗೆ ಉದ್ಯೋಗ ದೊರೆಯುತ್ತಿದ್ದರೆ, ಸಾಮಾನ್ಯ ಐಟಿಐಗಳಲ್ಲಿ ಈ ಪ್ರಮಾಣ ಶೇ 30ರಿಂದ 40ರಷ್ಟಿದೆ ಎಂದು ಹೇಳಲಾಗುತ್ತಿದೆ. ಆದರೆ, ಈ ಕುರಿತ ನಿಖರ ಮಾಹಿತಿ ಸಾರ್ವಜನಿಕವಾಗಿ ಲಭ್ಯವಿಲ್ಲ. ಪಾರದರ್ಶಕ ಅಂಕಿಅಂಶಗಳಿಲ್ಲದೆ, ಯಾವ ಐಟಿಐಗಳು ಉತ್ತಮವಾಗಿ ಕಾರ್ಯನಿರ್ವಹಿಸುತ್ತಿವೆ ಮತ್ತು ಯಾವುವು ಕೇವಲ ಪ್ರಮಾಣಪತ್ರಗಳನ್ನು ನೀಡುತ್ತಿವೆ ಎಂಬುದನ್ನು ತಿಳಿಯಲು ಸಾಧ್ಯವಿಲ್ಲ.

ಕರ್ನಾಟಕದ ಕೌಶಲ ಅಭಿವೃದ್ಧಿಯ ಸಮಸ್ಯೆಯನ್ನು ಕೇವಲ ಒಂದು ಸಮಾವೇಶದಿಂದ ಪರಿಹರಿಸಲು ಸಾಧ್ಯವಿಲ್ಲ. ಅದಕ್ಕೆ ಬಲವಾದ ಶಾಸನಬದ್ಧ ಚೌಕಟ್ಟು ಅಗತ್ಯ. ಬೆಂಗಳೂರು ಸ್ಕಿಲ್ ಸಮಿಟ್ 2026 ಈ ನಿಟ್ಟಿನಲ್ಲಿ ಒಂದು ಆರಂಭವಾಗಬಹುದು. ಆದರೆ, ಸಮಾವೇಶ ಮುಗಿದ ಬಳಿಕ ಕರ್ನಾಟಕ ವಿಧಾನಸಭೆಯು ಐಟಿಐ ಸುಧಾರಣೆಗೆ ಅಗತ್ಯವಾದ ಕಾನೂನುಬದ್ಧ ಅಧಿಕಾರ ಮತ್ತು ಬಲವನ್ನು ಒದಗಿಸಬೇಕು. ಇಲ್ಲದಿದ್ದರೆ, ಮುಂದಿನ ವರ್ಷದ ಸಮಾವೇಶದಲ್ಲೂ ನಾವು ಇದೇ ಸಮಸ್ಯೆಗಳ ಬಗ್ಗೆ ಚರ್ಚಿಸುತ್ತಿರುತ್ತೇವೆ.