बेपत्ता झाल्यानंतर कुटुंबियांकडून त्याचा शोध सुरू होता. त्याची दुचाकी नदीच्या किनारी बेवारस सापडली होती. त्यावरून पोलिसांनी त्याच्या कुटुंबिय आणि नातेवाईकांना माहिती दिली होती.

लग्नासाठी मुलगी बघायला गेलेल्या युवकाचा नदीत बुडून मृत्यू झाल्याची घटना सुरगाणा तालुक्यातील भेनशेत येथील खोबळा दिगर येथे घडली आहे. वसंत सुरेश मासी (वय २१) असे मृत युवकाचे नाव आहे. खोबळा दिगर (ता. सुरगाणा) येथील वसंत हा पार नदीच्या पलीकडे जवळच असलेल्या केळधा (रा. गुजरात) येथे मुलगी बघण्यासाठी बुधवारी निघाला होता. आपली दुचाकी भाटी येथे नदीच्या तीरावर उभी करून तो पायी नदी पार करण्यासाठी उतरला होता.

संबंधित भागात जोरदार पाऊस झाल्यामुळे पार नदीला पूर आलेला होता. याच पुराच्या पाण्यातून वसंत निघाला असता नदीच्या पात्रात पडल्याने तो पुराच्या पाण्यात वाहून गेला. चार दिवस उलटूनही वसंत घरी न आल्याने वडिलांनी सर्वत्र चौकशी केली. याचवेळी भाटी येथे एक दुचाकी बेवारस असल्याची माहिती कुटुंबाला व मित्रांना समजली. त्याची चौकशी केली असता ती वसंतची दुचाकी असल्याचे समजले. यावरुन अनुचित प्रकार घडला असल्याचे लक्षात आले. याच दरम्यान पाच किलोमीटर अंतरावर नदीच्या काठावर एक मृतदेह बेवारस अवस्थेत आढळून आल्याचे समजले. कुटुंबीयांनी मृतदेहाची पाहणी केली असता तो वसंत असल्याचे कळाले. या घटनेमुळे कुटुंबियांवर शोककळा पसरली आहे.