सध्या डॉ. निलेश जेजुरकर फरार असून पोलिस त्यांचा शोध घेत आहेत.

पोलिस सूत्रांनी दिलेल्या माहितीनुसार, डॉ. मनीषा यांचे पती निलेश यांचे एका महिला डॉक्टरसोबत अनैतिक संबंध सुरू होते. याची माहिती मनीषा यांना समजली होती. यातून जेजुरकर दाम्पत्यामध्ये मागील दोन वर्षांपासून वाद सुरू होता. घरात वाद असूनही निलेश यांचे प्रेमसंबंध बंद होत नव्हते. प्रेमसंबंधामुळे निलेश हा मनीषा यांना मानसिक आणि शारीरिक त्रास देत होता. याच छळाला कंटाळून मनीषा यांनी ७ मार्च रोजी आपल्या राहत्या घरात नायलॉन दोरीने गळफास घेऊन आत्महत्या केली. या प्रकरणामुळे मनीषा यांचा जीव गेला आणि निलेशवरही गुन्हा दाखल झाला आहे. तो सध्या फरार आहेत. या दाम्पत्याला दोन मुली आहेत. आईचा मृत्यू आणि वडील फरार, यामुळे या दोन्ही मुली देखील पोरक्या झाल्या आहेत.

डॉ. मनीषा यांची बहीण प्रा. रोहिणी थोरात यांनी गंगापूर पोलिस ठाण्यात दिलेल्या तक्रारीत खळबळजनक आरोप केले आहेत. तक्रारीनुसार, डॉ. निलेश जेजुरकर हे मनीषा यांचा दीर्घकाळापासून मानसिक छळ करत होते. निलेश यांचे दुसऱ्या एका महिला डॉक्टरशी अनैतिक संबंध होते. या संबंधांमध्ये मनीषा अडथळा ठरत असल्याने, त्यांना मानसिक त्रास दिला जात होता, असे तक्रारीत नमूद करण्यात आले आहे. याच छळाला कंटाळून डॉ. मनीषा यांनी टोकाचे पाऊल उचलल्याचा संशय त्यांनी व्यक्त केला आहे.

पोलिसांनी विविध कलमांतर्गत निलेश जेजुरकर विरोधात गुन्हा दाखल केला आहे. मात्र गुन्हा दाखल झाल्याची माहिती मिळताच निलेश जेजुरकर फरार झाला आहे. स्थानिक गुन्हे शाखा आणि गंगापूर रोड पोलिसांकडून त्याचा शोध घेतला जात आहे.