ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು ಈ ಸಾಧನೆಯನ್ನು 'ಮಹಾಕಾಯ ಸಾಧನೆ' ಎಂದು ಕರೆದಿದ್ದಾರೆ. ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಈ ಬೆಳವಣಿಗೆಯು ಹಣಕಾಸು ವರ್ಷದ ಉಳಿದ ಅವಧಿಗೆ ಶುಭ ಸೂಚಕ ಎಂದು ಹೇಳಿದ್ದಾರೆ. ಆದರೆ ಈ ಬೆಳವಣಿಗೆಯು ಸಮಾಜದ ಎಲ್ಲಾ ವರ್ಗಗಳಿಗೂ ತಲುಪುತ್ತಿದೆಯೇ, ಅಥವಾ ಮುಕ್ತ ಮಾರುಕಟ್ಟೆಯ ಲಾಭಗಳು ಕೆಲವೇ ಕೆಲವರಿಗೆ ಸೀಮಿತವಾಗುತ್ತಿವೆಯೇ?

ಬೆಳವಣಿಗೆಯ ಸಕಾರಾತ್ಮಕ ಅಂಶಗಳು

ವಿಶ್ವದ ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ಪ್ರಮುಖ ಆರ್ಥಿಕತೆ

2022-23ನೇ ಸಾಲನ್ನು ಹೊಸ ಮೂಲ ವರ್ಷವಾಗಿ ಪರಿಗಣಿಸಿರುವ ಲೆಕ್ಕಾಚಾರದ ಪ್ರಕಾರ, 2026-27ನೇ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದಲ್ಲಿ ನೈಜ ಜಿಡಿಪಿ ₹81.36 ಲಕ್ಷ ಕೋಟಿಗೆ ತಲುಪಿದೆ. ಇದೇ ಅವಧಿಯಲ್ಲಿ ನಾಮಮಾತ್ರ ಜಿಡಿಪಿ ಶೇ 10.3ರಷ್ಟು ಹೆಚ್ಚಾಗಿ ₹88.27 ಲಕ್ಷ ಕೋಟಿಗೆ ಏರಿಕೆಯಾಗಿದೆ. ನೀತಿ ಆಯೋಗದ ಪ್ರಕಾರ, ನಾಮಮಾತ್ರ ಜಿಡಿಪಿಯ ಆಧಾರದ ಮೇಲೆ ಭಾರತ ಈಗ ವಿಶ್ವದ ನಾಲ್ಕನೇ ಅತಿದೊಡ್ಡ ಆರ್ಥಿಕತೆಯಾಗಿದೆ.

ಸಿಟಿ ಇಂಡಿಯಾದ ಮುಖ್ಯ ಅರ್ಥಶಾಸ್ತ್ರಜ್ಞ ಸಮೀರನ್‌ ಚಕ್ರವರ್ತಿ ಅವರ ಪ್ರಕಾರ, ಈ ಬೆಳವಣಿಗೆ ಹಲವು ಕ್ಷೇತ್ರಗಳಲ್ಲಿ ಕಂಡುಬಂದ ಉತ್ತಮ ಪ್ರಗತಿಯಿಂದ ಸಾಧ್ಯವಾಗಿದೆ. ಹೂಡಿಕೆ, ಜನರ ಖರೀದಿ ಮತ್ತು ರಫ್ತು-ಮೂರೂ ಉತ್ತಮವಾಗಿ ಬೆಳೆದಿವೆ.

ಹೂಡಿಕೆ ಹೆಚ್ಚುತ್ತಿರುವುದು, ವಿಶೇಷವಾಗಿ ಖಾಸಗಿ ವಲಯದ ಬಂಡವಾಳ ವೆಚ್ಚ ಮತ್ತೆ ಚೇತರಿಸಿಕೊಳ್ಳುತ್ತಿರುವುದು, ಆರ್ಥಿಕ ಬೆಳವಣಿಗೆಗೆ ಮತ್ತಷ್ಟು ಸ್ಥಿರತೆ ನೀಡಬಹುದು ಎಂದು ಎಎನ್‌ಝಡ್‌ ರಿಸರ್ಚ್‌ನ ಅರ್ಥಶಾಸ್ತ್ರಜ್ಞ ಧೀರಜ್‌ ಹೇಳಿದ್ದಾರೆ.

ವಲಯಗಳ ಕಾರ್ಯಕ್ಷಮತೆ

ಸೇವಾ ವಲಯವು ಶೇ 10 ಬೆಳವಣಿಗೆಯೊಂದಿಗೆ ಪ್ರಮುಖ ಚಾಲಕ ಶಕ್ತಿಯಾಗಿದೆ. ಹಣಕಾಸು, ರಿಯಲ್ ಎಸ್ಟೇಟ್, ಐಟಿ ಮತ್ತು ವೃತ್ತಿಪರ ಸೇವೆಗಳು ಶೇ 12.1 ರಷ್ಟು ಬೆಳೆದಿವೆ. ಉತ್ಪಾದನಾ ವಲಯವು ಶೇ 9.2 ರಷ್ಟು ಗಟ್ಟಿ ಬೆಳವಣಿಗೆಯನ್ನು ತೋರಿಸಿದೆ.

ಹೂಡಿಕೆಯ ಪ್ರಾಬಲ್ಯ

ಸ್ಥೂಲ ಸ್ಥಿರ ಬಂಡವಾಳ ರಚನೆ (ಜಿಎಫ್‌ಸಿಎಫ್) ಶೇ 11.9ರಷ್ಟು ಹೆಚ್ಚಾಗಿದೆ. ಕಳೆದ ನಾಲ್ಕು ವರ್ಷಗಳಲ್ಲೇ ಇದು ಅತ್ಯಧಿಕ ಬೆಳವಣಿಗೆಯಾಗಿದೆ. ಎಎನ್‌ಝಡ್‌ ರಿಸರ್ಚ್‌ನ ಧೀರಜ್‌ ಅವರ ಪ್ರಕಾರ, ಹೂಡಿಕೆಯ ಪ್ರಮಾಣವೂ ಸುಮಾರು 13 ವರ್ಷಗಳಲ್ಲೇ ಗರಿಷ್ಠ ಮಟ್ಟ ತಲುಪಿದೆ. ಎಲ್‌&ಟಿ ಫೈನಾನ್ಸ್‌ನ ಮುಖ್ಯ ಅರ್ಥಶಾಸ್ತ್ರಜ್ಞೆ ರಜನಿ ಠಾಕೂರ್‌ ಅವರು ಈ ಬೆಳವಣಿಗೆಯನ್ನು 'ಅಚ್ಚರಿಯ ರೀತಿಯ ಉತ್ತಮ ಫಲಿತಾಂಶ' ಎಂದು ಹೇಳಿದ್ದಾರೆ. ಡಾಯ್ಚ್‌ ಬ್ಯಾಂಕ್‌ನ ಮುಖ್ಯ ಅರ್ಥಶಾಸ್ತ್ರಜ್ಞ ಕೌಶಿಕ್‌ ದಾಸ್‌ ಅವರು 2026-27ನೇ ಹಣಕಾಸು ವರ್ಷದಲ್ಲಿ ಭಾರತದ ಆರ್ಥಿಕ ಬೆಳವಣಿಗೆ ಶೇ 7ಕ್ಕಿಂತ ಹೆಚ್ಚಿನ ಮಟ್ಟದಲ್ಲಿ ಮುಂದುವರಿಯಬಹುದು ಎಂದು ಹೇಳಿದ್ದಾರೆ.

ಅರ್ಥಶಾಸ್ತ್ರಜ್ಞರ ಅನುಮಾನಗಳು

ಜಿಡಿಪಿಯುಆರ್ಥಿಕ ಉತ್ಪಾದನೆಯ ಪ್ರಮುಖ ಸೂಚಕವಾಗಿದ್ದರೂ, ಆದಾಯದ ಹಂಚಿಕೆ, ವ್ಯಕ್ತಿಯೊಬ್ಬರ ಆದಾಯ, ಉದ್ಯೋಗದ ಗುಣಮಟ್ಟ ಮತ್ತು ಅನೌಪಚಾರಿಕ ವಲಯದ ಪ್ರಮಾಣವನ್ನು ಜಿಡಿಪಿ ತೋರಿಸುವುದಿಲ್ಲ ಎಂದು ಬ್ರಿಟಿಷ್‌ ಅರ್ಥಶಾಸ್ತ್ರಜ್ಞೆ ಡಯಾನ್‌ ಕೊಯ್ಲ್‌ ಅವರು ತಮ್ಮ 'GDP: A Brief but Affectionate History' (2014) ಕೃತಿಯಲ್ಲಿ ಹೇಳಿದ್ದಾರೆ.

ಆರ್‌ಬಿಐನ ಮಾಜಿ ಗವರ್ನರ್‌ ರಘುರಾಮ್‌ ರಾಜನ್‌ ಅವರು ಭಾರತದ ಆರ್ಥಿಕ ಬೆಳವಣಿಗೆಯ ಅಧಿಕೃತ ಅಂಕಿ-ಅಂಶಗಳ ಬಗ್ಗೆ ಪ್ರಶ್ನೆ ಎತ್ತಿದ್ದಾರೆ. ಶೇ 7ಕ್ಕಿಂತ ಹೆಚ್ಚಿನ ಜಿಡಿಪಿ ಬೆಳವಣಿಗೆ ದಾಖಲಾಗುತ್ತಿದ್ದರೂ, ಕಾರ್ಪೊರೇಟ್‌ ಹೂಡಿಕೆ ದುರ್ಬಲವಾಗಿರುವುದು ಮತ್ತು ವಿದೇಶಿ ಬಂಡವಾಳದ ಹರಿವು ನಿಧಾನಗೊಂಡಿರುವುದು ಹೇಗೆ ಸಾಧ್ಯ ಎಂಬುದು ಅರ್ಥವಾಗುತ್ತಿಲ್ಲ ಎಂದು ಅವರು ಹೇಳಿದ್ದಾರೆ.

ಆರ್ಥಿಕತೆ ಈ ದರದಲ್ಲಿ ಬೆಳೆಯುತ್ತಿದ್ದರೆ, ಹೂಡಿಕೆ ಕೂಡ ಹೆಚ್ಚಾಗಬೇಕು. 'ಇಲ್ಲಿ ಏನೋ ಸರಿಯಾಗಿಲ್ಲ' ಎಂದು ಅವರು ಹೇಳಿದ್ದಾರೆ. ಕಳೆದ 10 ವರ್ಷಗಳ ಅಧಿಕೃತ ಅಂಕಿ-ಅಂಶಗಳಲ್ಲಿ ಕಾಣುತ್ತಿರುವ ಬೆಳವಣಿಗೆಯನ್ನು ಗಮನಿಸಿದರೆ, ಅವು ಸೂಚಿಸುವುದಕ್ಕಿಂತ ಭಾರತದ ಆರ್ಥಿಕತೆ ಕಡಿಮೆ ವೇಗದಲ್ಲಿ ಬೆಳೆಯುತ್ತಿರಬಹುದು ಎಂದು ರಾಜನ್‌ ಹೇಳಿದ್ದಾರೆ.

ಆರ್‌ಬಿಐನ ಮಾಜಿ ಗವರ್ನರ್‌ ಹಾಗೂ ಪ್ರಧಾನಿ ಆರ್ಥಿಕ ಸಲಹಾ ಮಂಡಳಿಯ ಮಾಜಿ ಅಧ್ಯಕ್ಷ ಸಿ. ರಂಗರಾಜನ್‌ ಅವರು ಜಿಡಿಪಿ ದತ್ತಾಂಶವನ್ನು 'ಉತ್ಸಾಹದಾಯಕವಾಗಿಲ್ಲ' ಎಂದು ಹೇಳಿದ್ದಾರೆ. ಎರಡನೇ ತ್ರೈಮಾಸಿಕದಲ್ಲಿ ಬೆಳವಣಿಗೆ ಮತ್ತಷ್ಟು ನಿಧಾನಗೊಳ್ಳುವ ಸಾಧ್ಯತೆಯಿದೆ ಎಂದೂ ಅವರು ಹೇಳಿದ್ದಾರೆ.

ಅರ್ಥಶಾಸ್ತ್ರಜ್ಞ ಡಾ. ವಿಜಯ್‌ ಸರ್ದಾನಾ ಅವರು ಜಿಡಿಪಿ ಶೇ 7.8ರಷ್ಟು ಬೆಳವಣಿಗೆಯಾಗಿದೆ ಎಂಬ ಅಂಕಿ ಕಂಡು 'ಎಲ್ಲವೂ ಸರಿಯಾಗಿದೆ' ಎಂದು ತೀರ್ಮಾನಿಸಬಾರದು ಎಂದು ಎಚ್ಚರಿಸಿದ್ದಾರೆ. ಉತ್ಪಾದನೆ ಮತ್ತು ಸೇವಾ ವಲಯಗಳು ಬೆಳೆಯುತ್ತಿದ್ದರೂ, ಅವುಗಳಿಗೆ ಕಚ್ಚಾ ವಸ್ತುಗಳನ್ನು ಪೂರೈಸುವ ಕೃಷಿ ವಲಯದ ಬೆಳವಣಿಗೆ ಶೇ 3.6ಕ್ಕೆ ಸೀಮಿತವಾಗಿದೆ. ಗಣಿಗಾರಿಕೆ ವಲಯವೂ ಕುಸಿತ ಮತ್ತು ನಿಧಾನಗತಿಯನ್ನು ಎದುರಿಸುತ್ತಿದೆ ಎಂದು ಅವರು ಹೇಳಿದ್ದಾರೆ.

ಸಂಕ್ಷಿಪ್ತ ಮಾಹಿತಿ - ಪೂರ್ಣ ವಿವರಣೆಗೆ ಕ್ಲಿಕ್ ಮಾಡಿಪ್ರಮುಖ ಮುಖ್ಯಾಂಶಗಳ ಸಂಕ್ಷಿಪ್ತ ಸಾರಾಂಶ

ವಿವೇಕ್ ತೋಂಟದಾರ್ಯ ವಿಶ್ಲೇಷಣೆ | ಶೇ 7.8 ಜಿಡಿಪಿ: ಹೊಳೆಯುವ ಸಂಖ್ಯೆಗಳಾಚೆ...

ಒಂದು ಸಾಲಿನಲ್ಲಿಭಾರತದ ಶೇ 7.8ರ ಜಿಡಿಪಿ ಬೆಳವಣಿಗೆಯು ಆರ್ಥಿಕ ಪ್ರಗತಿಯನ್ನು ಸೂಚಿಸಿದರೂ, ಅದರ ವಿಶ್ವಾಸಾರ್ಹತೆ, ಉದ್ಯೋಗ ಸೃಷ್ಟಿ ಮತ್ತು ಸಾಮಾಜಿಕ ಸಮಾನತೆಯ ಕುರಿತು ತಜ್ಞರು ಗಂಭೀರ ಪ್ರಶ್ನೆಗಳನ್ನು ಎತ್ತಿದ್ದಾರೆ.

ಪ್ರಮುಖ ಪ್ರಶ್ನೋತ್ತರ

ಜಿಡಿಪಿ ದರವು ಆರ್‌ಬಿಐ ಅಂದಾಜಿಗಿಂತ ಹೆಚ್ಚಾಗಿದೆಯೇ?

ಹೌದು, ಭಾರತದ ನೈಜ ಜಿಡಿಪಿ ವೃದ್ಧಿಯು ಆರ್‌ಬಿಐ ಅಂದಾಜಿಸಿದ್ದ ಶೇ 7ಕ್ಕಿಂತ ಅಧಿಕವಾಗಿ ಶೇ 7.8ರಷ್ಟು ದಾಖಲಾಗಿದೆ.

ಜಿಡಿಪಿ ಬೆಳವಣಿಗೆಯ ಬಗ್ಗೆ ಅರ್ಥಶಾಸ್ತ್ರಜ್ಞರ ಆತಂಕವೇನು?

ಅಧಿಕೃತ ಅಂಕಿ-ಅಂಶಗಳು ವಾಸ್ತವಕ್ಕಿಂತ ಭಿನ್ನವಾಗಿರಬಹುದು ಮತ್ತು ಕಾರ್ಪೊರೇಟ್ ಹೂಡಿಕೆ ಹಾಗೂ ವಿದೇಶಿ ಬಂಡವಾಳದ ಹರಿವು ನಿಧಾನವಾಗಿರುವುದು ಅನುಮಾನಗಳನ್ನು ಹುಟ್ಟುಹಾಕಿದೆ ಎಂದು ರಘುರಾಮ್ ರಾಜನ್ ಮೊದಲಾದವರು ಅಭಿಪ್ರಾಯಪಟ್ಟಿದ್ದಾರೆ.

ಜಿಡಿಪಿ ಲೆಕ್ಕಾಚಾರದ ಹೊಸ ಮೂಲ ವರ್ಷ ಯಾವುದು?

ಸರ್ಕಾರವು ಜಿಡಿಪಿ ಲೆಕ್ಕಾಚಾರದ ಮೂಲ ವರ್ಷವನ್ನು 2011-12ರಿಂದ 2022-23ಕ್ಕೆ ಬದಲಾಯಿಸಿದೆ, ಇದು ದತ್ತಾಂಶದ ಹೋಲಿಕೆ ಮತ್ತು ನಿಖರತೆಯ ಬಗ್ಗೆ ಚರ್ಚೆಗೆ ಕಾರಣವಾಗಿದೆ.

ಷೇರು ಮಾರುಕಟ್ಟೆಯ ಮೇಲೆ ಜಿಡಿಪಿ ದತ್ತಾಂಶದ ಪರಿಣಾಮವೇನು?

ಜಿಡಿಪಿ ಅಂಕಿಅಂಶಗಳು ಬಿಡುಗಡೆಯಾದ ಬಳಿಕವೂ ಮಾರುಕಟ್ಟೆಯಲ್ಲಿ ಉತ್ಸಾಹ ಕಂಡುಬರಲಿಲ್ಲ; ಬದಲಾಗಿ ಎಫ್‌ಐಐಗಳ ಮಾರಾಟದಿಂದಾಗಿ ಸೆನ್ಸೆಕ್ಸ್ ಮತ್ತು ನಿಫ್ಟಿ ಸೂಚ್ಯಂಕಗಳು ಕುಸಿತ ಕಂಡವು.

ಭಾರತೀಯ ಆರ್ಥಿಕತೆಗೆ ಮುಂದಿನ ದಿನಗಳಲ್ಲಿರುವ ಸವಾಲುಗಳೇನು?

ಅಮೆರಿಕ-ಇರಾನ್ ಸಂಘರ್ಷದಿಂದ ಉಂಟಾಗಿರುವ ತೈಲ ಬೆಲೆ ಏರಿಕೆ, ಜಾಗತಿಕ ಬಾಂಡ್ ಇಳುವರಿ ಮತ್ತು ಭೌಗೋಳಿಕ ರಾಜಕೀಯ ಅಸ್ಥಿರತೆಯು ಆರ್ಥಿಕತೆಗೆ ಪ್ರಮುಖ ಅಪಾಯಗಳಾಗಿವೆ.

ಪ್ರಮುಖ ಅಂಕಿಅಂಶಗಳು

ಶೇ 7.8ತ್ರೈಮಾಸಿಕ ಜಿಡಿಪಿ ಬೆಳವಣಿಗೆಶೇ 10.3ನಾಮಮಾತ್ರ ಜಿಡಿಪಿ ಏರಿಕೆಶೇ 11.9ಸ್ಥೂಲ ಸ್ಥಿರ ಬಂಡವಾಳ ರಚನೆ (ಜಿಎಫ್‌ಸಿಎಫ್) ಹೆಚ್ಚಳಶೇ 10ಸೇವಾ ವಲಯದ ಬೆಳವಣಿಗೆಶೇ 3.6ಕೃಷಿ ವಲಯದ ಬೆಳವಣಿಗೆ

ಎಐ ಬಳಸಿ ಸಂಸ್ಕರಿಸಲಾಗಿದೆ. ಪಿವಿ ಡಿಜಿಟಲ್ ತಂಡ ಪರಿಶೀಲಿಸಿದೆ

ಮುಂದಿನ ಅಪಾಯಗಳು

ಐಸಿಆರ್‌ಎ ಲಿಮಿಟೆಡ್‌ನ ಮುಖ್ಯ ಅರ್ಥಶಾಸ್ತ್ರಜ್ಞೆ ಅದಿತಿ ನಾಯರ್‌ ಅವರ ಪ್ರಕಾರ, ಜಿಡಿಪಿ ಬೆಳವಣಿಗೆ ಶೇ 7.8ರಷ್ಟು ದಾಖಲಾಗಿರುವುದು ಅವರ ಶೇ 7ರ ಅಂದಾಜಿಗಿಂತ ಹೆಚ್ಚಾಗಿದೆ. ಆದರೂ, ಆರ್ಥಿಕತೆಗೆ ಇರುವ ಅಪಾಯಗಳು ಮುಂದುವರಿದಿವೆ ಎಂದು ಅವರು ಎಚ್ಚರಿಸಿದ್ದಾರೆ.

ಕೇರ್‌ಎಡ್ಜ್‌ ರೇಟಿಂಗ್ಸ್‌ನ ಮುಖ್ಯ ಅರ್ಥಶಾಸ್ತ್ರಜ್ಞೆ ರಜನಿ ಸಿನ್ಹಾ ಅವರು ಮುಂದಿನ ತ್ರೈಮಾಸಿಕಗಳಲ್ಲಿ ಆರ್ಥಿಕ ಬೆಳವಣಿಗೆ ಸ್ವಲ್ಪ ನಿಧಾನಗೊಳ್ಳಬಹುದು ಎಂದು ಹೇಳಿದ್ದಾರೆ. ಭೌಗೋಳಿಕ ರಾಜಕೀಯ ಉದ್ವಿಗ್ನತೆ ಮತ್ತು ಎಲ್‌ ನಿನೊ ಪರಿಸ್ಥಿತಿಯಿಂದ ಕೃಷಿ ಉತ್ಪಾದನೆಗೆ ಉಂಟಾಗಬಹುದಾದ ಹಿನ್ನಡೆಯನ್ನು ಅವರು ಪ್ರಮುಖ ಅಪಾಯಗಳೆಂದು ಗುರುತಿಸಿದ್ದಾರೆ.

ಎಸ್‌ಬಿಐ ಕ್ಯಾಪಿಟಲ್‌ ಮಾರ್ಕೆಟ್ಸ್‌ (ಎಸ್‌ಬಿಐಸಿಎಪಿಎಸ್‌) ವರದಿಯ ಪ್ರಕಾರ, ಹೆಚ್ಚಿನ ಬೆಲೆಗಳು ಮತ್ತು ಗ್ರಾಮೀಣ ಬೇಡಿಕೆ ನಿಧಾನಗೊಂಡಿರುವುದರಿಂದ ಖಾಸಗಿ ಬಳಕೆಯ ಮೇಲೆ ಮುಂದಿನ ತ್ರೈಮಾಸಿಕಗಳಲ್ಲಿ ಪರಿಣಾಮ ಬೀರಬಹುದು.

ದತ್ತಾಂಶ ವಿಧಾನದ ಬಗ್ಗೆ ವಿವಾದ

ಶೇ 7.8ರ ಜಿಡಿಪಿ ಬೆಳವಣಿಗೆಯ ಲೆಕ್ಕಾಚಾರಕ್ಕೆ ಬಳಸಿರುವ ವಿಧಾನದ ಬಗ್ಗೆಯೂ ಚರ್ಚೆ ನಡೆಯುತ್ತಿದೆ. ಫೆಬ್ರುವರಿ 2026ರಲ್ಲಿ ಜಿಡಿಪಿ ಲೆಕ್ಕಾಚಾರದ ಮೂಲ ವರ್ಷವನ್ನು 2011-12ರಿಂದ 2022-23ಕ್ಕೆ ಬದಲಾಯಿಸಲಾಯಿತು. ಹೊಸ ಸರಣಿಯ ಪ್ರಕಾರ, 2025-26ರ ಮೊದಲ ತ್ರೈಮಾಸಿಕದ ನಾಮಮಾತ್ರ ಜಿಡಿಪಿ ಹಿಂದಿನ ಅಂದಾಜಿನ ₹86.1 ಲಕ್ಷ ಕೋಟಿಯಿಂದ ಸುಮಾರು ₹80 ಲಕ್ಷ ಕೋಟಿಗೆ ಇಳಿಕೆಯಾಗಿದೆ. ಮಾಜಿ ಆರ್ಥಿಕ ಸಚಿವ ಸುಭಾಷ್‌ ಚಂದ್ರ ಗರ್ಗ್‌ ಅವರು ಹೊಸ ಮೂಲ ವರ್ಷದ ಲೆಕ್ಕಾಚಾರವನ್ನು ಆಧರಿಸಿ, ನೈಜ ಜಿಡಿಪಿ ಬೆಳವಣಿಗೆ ಶೇ 2.6ರಷ್ಟೇ ಇದೆ ಎಂದು ವಾದಿಸಿದ್ದಾರೆ. 2025-26ರ ಮೊದಲ ತ್ರೈಮಾಸಿಕದ ಪರಿಷ್ಕೃತ ಜಿಡಿಪಿಯನ್ನು 2026-27ರ ಮೊದಲ ತ್ರೈಮಾಸಿಕದ ಜಿಡಿಪಿಯೊಂದಿಗೆ ಹೋಲಿಸಿದಾಗ ಈ ಕಡಿಮೆ ಬೆಳವಣಿಗೆ ಕಂಡುಬರುತ್ತದೆ ಎಂದು ಅವರು ಹೇಳಿದ್ದಾರೆ.

ಸಾಂಖ್ಯಿಕ ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯದ ಕಾರ್ಯದರ್ಶಿ ಸೌರಭ್‌ ಗರ್ಗ್‌ ಅವರು ಈ ಹೋಲಿಕೆಯನ್ನು ತಿರಸ್ಕರಿಸಿದ್ದಾರೆ. ಹಳೆಯ (2011-12) ಮತ್ತು ಹೊಸ (2022-23) ಜಿಡಿಪಿ ಸರಣಿಗಳನ್ನು ಹೋಲಿಸುವುದು 'ಸೇಬು ಮತ್ತು ಕಿತ್ತಳೆ ಹೋಲಿಸಿದಂತೆ' ಎಂದು ಅವರು ಹೇಳಿದ್ದಾರೆ. ಹೊಸ ಮೂಲ ವರ್ಷದಲ್ಲಿ ಲೆಕ್ಕಾಚಾರದ ವಿಧಾನದಲ್ಲೂ ಬದಲಾವಣೆಗಳನ್ನು ಮಾಡಲಾಗಿದ್ದು, ಇದು ಆರ್ಥಿಕತೆಯ ಸ್ಥಿತಿಯನ್ನು ಹೆಚ್ಚು ನಿಖರವಾಗಿ ಪ್ರತಿಬಿಂಬಿಸುತ್ತದೆ ಎಂದು ಅವರು ಹೇಳಿದ್ದಾರೆ. ಆದರೆ, ಹೊಸ ಲೆಕ್ಕಾಚಾರದ ವಿಧಾನವನ್ನು ಕೆಲವರು 'ಅಂಕಿಅಂಶಗಳ ಕಸರತ್ತು' ಎಂದು ಟೀಕಿಸಿದ್ದಾರೆ.

ಐಎಂಎಫ್‌ 'ಸಿ' ಶ್ರೇಣಿ ನೀಡಿದ್ದು ಕೂಡ ಈ ವಿವಾದವನ್ನು ಮತ್ತಷ್ಟು ಹೆಚ್ಚಿಸಿದೆ. 2011-12ರ ಹಳೆಯ ಮೂಲ ವರ್ಷವನ್ನು ಬಳಸಿರುವ ಭಾರತದ ರಾಷ್ಟ್ರೀಯ ಲೆಕ್ಕಪತ್ರಗಳಿಗೆ ಐಎಂಎಫ್ 'ಸಿ' ಶ್ರೇಣಿ ನೀಡಿತ್ತು. 2026ರಲ್ಲೂ ಸತತ ಎರಡನೇ ವರ್ಷ ಇದೇ ಶ್ರೇಣಿ ನೀಡಲಾಗಿದ್ದು, ಅಂತರರಾಷ್ಟ್ರೀಯ ಮಟ್ಟದಲ್ಲಿ ಭಾರತದ ಆರ್ಥಿಕ ದತ್ತಾಂಶದ ಗುಣಮಟ್ಟದ ಬಗ್ಗೆ ಕಳವಳಕ್ಕೆ ಕಾರಣವಾಗಿದೆ. ಆದರೆ, ಐಎಂಎಫ್‌ ಭಾರತದ ಜಿಡಿಪಿ ಬೆಳವಣಿಗೆಯ ಅಂಕಿಅಂಶಗಳನ್ನು ಪ್ರಶ್ನಿಸಿಲ್ಲ ಎಂದು ಹಣಕಾಸು ಸಚಿವರು ಹೇಳಿದ್ದಾರೆ. ಹೊಸ ಮೂಲ ವರ್ಷದ ಲೆಕ್ಕಾಚಾರ ಜಾರಿಗೆ ಬಂದ ಬಳಿಕ ಐಎಂಎಫ್ ತನ್ನ ಶ್ರೇಣಿಯನ್ನು ಸುಧಾರಿಸುವ ನಿರೀಕ್ಷೆಯಿದೆ.

ಷೇರು ಮಾರುಕಟ್ಟೆಯ ಮೌನ!

ಶೇ 7.8ರ ಜಿಡಿಪಿ ಬೆಳವಣಿಗೆಯ ಹೊರತಾಗಿಯೂ, ದೊಡ್ಡ ಸಾಂಸ್ಥಿಕ ಹೂಡಿಕೆದಾರರ (ಎಫ್‌ಐಐ ಮತ್ತು ಡಿಐಐ) ಖರೀದಿ ಮಾರುಕಟ್ಟೆಗೆ ಹೆಚ್ಚಿನ ಬೆಂಬಲ ನೀಡಲಿಲ್ಲ. ಸೆಪ್ಟೆಂಬರ್‌ 1ರಂದು ಜಿಡಿಪಿ ಬೆಳವಣಿಗೆಯ ಅಂಕಿ ಬಿಡುಗಡೆಯಾದರೂ ಷೇರುಪೇಟೆ ಏರಿಕೆ ಕಾಣಲಿಲ್ಲ. ಇದನ್ನು ಕಾಂಗ್ರೆಸ್‌ ನಾಯಕರು 'ಸ್ಟಾಕ್‌ ಮಾರ್ಕೆಟ್‌ನಲ್ಲಿ ಖುಷಿಯ ಅಲೆ' ಎಂದು ವ್ಯಂಗ್ಯವಾಡಿದ್ದಾರೆ. ಸೆಪ್ಟೆಂಬರ್‌ 1 ಮತ್ತು 2ರಂದು ಸತತ ಎರಡು ದಿನ ಸೆನ್ಸೆಕ್ಸ್‌ ಮತ್ತು ನಿಫ್ಟಿ ಕುಸಿದವು. ಸೆಪ್ಟೆಂಬರ್‌ 2ರಂದು ಸೆನ್ಸೆಕ್ಸ್‌ 373.93 ಅಂಕ (ಶೇ 0.49) ಕುಸಿದು 76,570.35ಕ್ಕೆ ತಲುಪಿತು. ನಿಫ್ಟಿ 141.35 ಅಂಕ (ಶೇ 0.59) ಕುಸಿದು 23,914.45ಕ್ಕೆ ಇಳಿಯಿತು. ಎರಡು ದಿನಗಳಲ್ಲಿ ಸೆನ್ಸೆಕ್ಸ್‌ ಒಟ್ಟು 800ಕ್ಕೂ ಹೆಚ್ಚು ಅಂಕ ಕುಸಿದಿದೆ.

ಸೆಪ್ಟೆಂಬರ್‌ 1ರಂದು ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು (ಎಫ್‌ಐಐ) ₹7,986 ಕೋಟಿ ಮೌಲ್ಯದ ಷೇರುಗಳನ್ನು ನಿವ್ವಳವಾಗಿ ಮಾರಾಟ ಮಾಡಿದ್ದಾರೆ. ಇದರಿಂದ ಜುಲೈನಿಂದೀಚೆಗೆ ಅವರ ಒಟ್ಟು ನಿವ್ವಳ ಹೂಡಿಕೆಯ ಸುಮಾರು ಶೇ 40ರಷ್ಟು ಕಡಿಮೆಯಾಗಿದೆ. ಎಂಎಸ್‌ಸಿಐ ಮರುಹೊಂದಾಣಿಕೆಯ ಬಳಿಕ ಕೇವಲ ಮೂರು ದಿನಗಳಲ್ಲಿ ಎಫ್‌ಐಐಗಳು ಎರಡು ತಿಂಗಳ ಖರೀದಿಯ ಬಹುಪಾಲನ್ನು ಹಿಂಪಡೆದಿದ್ದಾರೆ. 2026ರಲ್ಲಿ ಈವರೆಗೆ ಎಫ್‌ಐಐಗಳ ನಿವ್ವಳ ಮಾರಾಟ ₹3.50 ಲಕ್ಷ ಕೋಟಿಗೆ ತಲುಪಿದೆ.

ಡಿಐಐಗಳು ಸೆಪ್ಟೆಂಬರ್‌ 2ರಂದು ₹6,688 ಕೋಟಿ ಮೌಲ್ಯದ ಷೇರುಗಳನ್ನು ಖರೀದಿಸಿದರೂ, ಎಫ್‌ಐಐಗಳ ಭಾರಿ ಮಾರಾಟವನ್ನು ಸರಿದೂಗಿಸಲು ಅದು ಸಾಕಾಗಲಿಲ್ಲ.

ಕುಸಿತಕ್ಕೆ ಮೂರು ಪ್ರಮುಖ ಕಾರಣಗಳು

1. ಅಮೆರಿಕ-ಇರಾನ್ ಸಂಘರ್ಷ:

ಹೊಸ ಮಿಸೈಲ್‌ ಮತ್ತು ಡ್ರೋನ್‌ ದಾಳಿಗಳಿಂದ ಪಶ್ಚಿಮ ಏಷ್ಯಾದಲ್ಲಿ ಮತ್ತೆ ಉದ್ವಿಗ್ನತೆ ಹೆಚ್ಚಾಗಿದೆ. ಸಂಘರ್ಷ ಶೀಘ್ರದಲ್ಲೇ ಬಗೆಹರಿಯುವ ನಿರೀಕ್ಷೆ ಕಡಿಮೆಯಾಗಿದ್ದು, ತೈಲ ಬೆಲೆ ಮತ್ತಷ್ಟು ಏರಬಹುದು ಎಂಬ ಆತಂಕವೂ ಹೆಚ್ಚಿದೆ. ಜಿಯೋಜಿತ್‌ನ ಮುಖ್ಯ ಹೂಡಿಕೆ ತಂತ್ರಜ್ಞ ಡಾ. ವಿ.ಕೆ. ವಿಜಯಕುಮಾರ್‌ ಅವರ ಪ್ರಕಾರ, ಬ್ರೆಂಟ್‌ ಕಚ್ಚಾ ತೈಲ ಬೆಲೆ ಒಂದೇ ರಾತ್ರಿಯಲ್ಲಿ ಶೇ 5ರಷ್ಟು ಏರಿಕೆಯಾಗಿರುವುದು ಮಾರುಕಟ್ಟೆಯ ಮೇಲೆ ನಕಾರಾತ್ಮಕ ಪರಿಣಾಮ ಬೀರಿದೆ.

2. ಕಚ್ಚಾ ತೈಲ ಬೆಲೆ ಏರಿಕೆ:

ಬ್ರೆಂಟ್‌ ಕಚ್ಚಾ ತೈಲ ಬೆಲೆ ಒಂದೇ ರಾತ್ರಿಯಲ್ಲಿ ಸುಮಾರು ಶೇ 5ರಷ್ಟು ಏರಿಕೆಯಾಗಿ ಬ್ಯಾರೆಲ್‌ಗೆ 96 ಡಾಲರ್‌ಗೆ ತಲುಪಿದೆ. ಅಮೆರಿಕ-ಇರಾನ್‌ ಉದ್ವಿಗ್ನತೆಯಿಂದ ಇದು ಸುಮಾರು ಆರು ವಾರಗಳ ಗರಿಷ್ಠ ಮಟ್ಟವಾಗಿದೆ. ಭಾರತದ ತೈಲ ಅಗತ್ಯದ ಶೇ 85-90ರಷ್ಟು ಆಮದು ಮಾಡಿಕೊಳ್ಳುವುದರಿಂದ, ತೈಲ ಬೆಲೆ ಏರಿಕೆಯಾದರೆ ಹಣದುಬ್ಬರ ಹೆಚ್ಚುವ ಸಾಧ್ಯತೆಯಿದೆ. ಅಲ್ಲದೆ, ಕಂಪನಿಗಳ ಲಾಭ ಮತ್ತು ಚಾಲ್ತಿ ಖಾತೆ ಮೇಲೂ ಒತ್ತಡ ಬೀಳಬಹುದು.

3. ಜಾಗತಿಕ ಬಾಂಡ್‌ ಇಳುವರಿ ಏರಿಕೆ:

ಅಮೆರಿಕದ 10 ವರ್ಷಗಳ ಟ್ರೆಜರಿ ಬಾಂಡ್‌ ಇಳುವರಿ ಶೇ 4.79ಕ್ಕೆ ಏರಿದೆ. ಬಾಂಡ್‌ ಇಳುವರಿ ಹೆಚ್ಚಾದಾಗ, ಹೂಡಿಕೆದಾರರಿಗೆ ಷೇರುಗಳಿಗಿಂತ ಬಾಂಡ್‌ಗಳು ಹೆಚ್ಚು ಆಕರ್ಷಕವಾಗಬಹುದು.

ಬ್ಯಾಂಕಿಂಗ್‌ ಮತ್ತು ಮಾರುಕಟ್ಟೆ ತಜ್ಞ ಅಜಯ್‌ ಬಗ್ಗಾ ಅವರ ಪ್ರಕಾರ, ಇರಾನ್‌ ಯುದ್ಧದಿಂದ ಉಂಟಾಗಿರುವ ಅಸ್ಥಿರತೆ ಭಾರತೀಯ ಮಾರುಕಟ್ಟೆಗಳಿಗೆ ಸವಾಲಾಗಿದೆ. ಸದ್ಯ ಜಾಗತಿಕ ಬೆಳವಣಿಗೆಗಳ ಪ್ರಭಾವ ದೇಶೀಯ ಆರ್ಥಿಕ ಪರಿಸ್ಥಿತಿಗಿಂತ ಹೆಚ್ಚಾಗಿದೆ.

ಡಾ. ವಿ.ಕೆ. ವಿಜಯಕುಮಾರ್‌ ಅವರು, ಭಾರತೀಯ ಮಾರುಕಟ್ಟೆ ದೇಶೀಯ ಅನುಕೂಲಗಳು ಮತ್ತು ಹೊರಗಿನ ಅಪಾಯಗಳ ನಡುವೆ ಸೂಕ್ಷ್ಮ ಸಮತೋಲನದಲ್ಲಿದೆ ಎಂದು ಹೇಳಿದ್ದಾರೆ. ಶೇ 7.8ರ ಜಿಡಿಪಿ ಬೆಳವಣಿಗೆ, ಉತ್ತಮ ಜಿಎಸ್‌ಟಿ ಸಂಗ್ರಹ, ಸಾಲದ ಬೆಳವಣಿಗೆ ಮತ್ತು ವಾಹನ ಮಾರಾಟದ ಅಂಕಿಅಂಶಗಳು ದೇಶೀಯವಾಗಿ ಆಶಾದಾಯಕ ಬೆಳವಣಿಗೆಗಳಾಗಿವೆ. ಆದರೆ, ಅಮೆರಿಕ-ಇರಾನ್‌ ಸಂಘರ್ಷ ಮತ್ತು ಕಚ್ಚಾ ತೈಲ ಬೆಲೆ ಏರಿಕೆ ಪ್ರಮುಖ ಅಪಾಯಗಳಾಗಿವೆ ಎಂದು ಅವರು ಹೇಳಿದ್ದಾರೆ.

ಮುಕ್ತ ಮಾರುಕಟ್ಟೆಯ ಅತಿಯಾದ ಪಾತ್ರ

ಮುಕ್ತ ಮಾರುಕಟ್ಟೆಗಳು ಸ್ಪರ್ಧೆ ಮತ್ತು ದಕ್ಷತೆಯನ್ನು ಆಧರಿಸಿ ಕಾರ್ಯನಿರ್ವಹಿಸುತ್ತವೆ. ಮೌಲ್ಯ ಸೃಷ್ಟಿಸುವವರಿಗೆ ಅವು ಪ್ರತಿಫಲ ನೀಡುತ್ತವೆ. ಆದರೆ ಇದಕ್ಕೆ ಎಲ್ಲರಿಗೂ ಸಮಾನ ಅವಕಾಶಗಳು ಇರಬೇಕು. ವಾಸ್ತವದಲ್ಲಿ ಅಂತಹ ಸಮಾನ ಅವಕಾಶಗಳು ಎಲ್ಲರಿಗೂ ಇರುವುದಿಲ್ಲ ಎಂದು ಗೈ ಸ್ಟ್ಯಾಂಡಿಂಗ್‌ ಅವರು ತಮ್ಮ 'ದಿ ಪ್ರೆಕಾರಿಯೆಟ್: ದಿ ನ್ಯೂ ಡೇಂಜರಸ್ ಕ್ಲಾಸ್' (2021) ಕೃತಿಯಲ್ಲಿ ವಿವರಿಸಿದ್ದಾರೆ.

ಭಾರತದಲ್ಲಿ ಶೇ 80ಕ್ಕೂ ಹೆಚ್ಚು ಕಾರ್ಮಿಕರು ಅನೌಪಚಾರಿಕ ವಲಯದಲ್ಲಿ ಕೆಲಸ ಮಾಡುತ್ತಿದ್ದಾರೆ. ದೇಶದ ಜಿಡಿಪಿಗೆ ಅನೌಪಚಾರಿಕ ವಲಯದ ಕೊಡುಗೆ ಸುಮಾರು ಅರ್ಧದಷ್ಟಿದ್ದರೂ, ಅದರ ಆರ್ಥಿಕ ಚಟುವಟಿಕೆಗಳನ್ನು ಸಮರ್ಪಕವಾಗಿ ಅಳೆಯಲಾಗುತ್ತಿಲ್ಲ ಎಂದು ಅರ್ಥಶಾಸ್ತ್ರಜ್ಞರು ಎಚ್ಚರಿಸಿದ್ದಾರೆ. ಭಾರತದ ರಾಷ್ಟ್ರೀಯ ಲೆಕ್ಕಪತ್ರಗಳಿಗೆ ಐಎಂಎಫ್‌ ನೀಡಿರುವ 'ಸಿ' ಶ್ರೇಣಿಯೂ ಅಂಕಿಅಂಶಗಳ ವಿಶ್ವಾಸಾರ್ಹತೆ ಬಗ್ಗೆ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ.

ಯುವ ಪದವೀಧರರಲ್ಲಿ ಶೇ 40ರಷ್ಟು ಮಂದಿ ನಿರುದ್ಯೋಗಿಗಳಾಗಿರುವುದು ಉದ್ಯೋಗ ಸೃಷ್ಟಿಯಲ್ಲಿನ ಸಮಸ್ಯೆಯನ್ನು ತೋರಿಸುತ್ತದೆ. ಇದೇ ವೇಳೆ, ಅತಿ ಶ್ರೀಮಂತ ಶೇ 1ರಷ್ಟು ಜನರು ದೇಶದ ಒಟ್ಟು ಸಂಪತ್ತಿನ ಶೇ 40ರಷ್ಟು ಹೊಂದಿದ್ದಾರೆ.

ಐತಿಹಾಸಿಕವಾಗಿ, ಮಾರುಕಟ್ಟೆಗಳನ್ನು ನಿಯಂತ್ರಿಸಲು, ಸಂಪತ್ತನ್ನು ಮರುಹಂಚಿಕೆ ಮಾಡಲು ಮತ್ತು ಆರ್ಥಿಕ ನ್ಯಾಯವನ್ನು ಖಚಿತಪಡಿಸಲು ಸರ್ಕಾರಗಳು ಮಧ್ಯಪ್ರವೇಶಿಸುತ್ತಾ ಬಂದಿವೆ. ಆದರೆ 1980ರ ದಶಕದಿಂದ ಅನಿಯಂತ್ರಣ ಮತ್ತು ಖಾಸಗೀಕರಣದತ್ತ ಬದಲಾವಣೆ ಕಂಡುಬಂದಿದೆ ಎಂದು ಡೇವಿಡ್‌ ಹಾರ್ವೆ ಅವರು 'ಎ ಬ್ರೀಫ್ ಹಿಸ್ಟರಿ ಆಫ್ ನಿಯೋಲಿಬರಲಿಸಂ' (2005) ಕೃತಿಯಲ್ಲಿ ವಿವರಿಸಿದ್ದಾರೆ.

ಪರಿಣಾಮಕಾರಿ ನಿಯಂತ್ರಣ ಎಂದರೆ ಆರ್ಥಿಕ ಸ್ವಾತಂತ್ರ್ಯವನ್ನು ಕಡಿಮೆ ಮಾಡುವುದು ಎಂದಲ್ಲ. ಬದಲಾಗಿ, ಹೊಣೆಗಾರಿಕೆ, ನೈತಿಕ ವ್ಯವಹಾರ ಪದ್ಧತಿ ಮತ್ತು ಸಂಪನ್ಮೂಲಗಳ ನ್ಯಾಯಯುತ ಹಂಚಿಕೆಯನ್ನು ಖಚಿತಪಡಿಸುವುದು ಎಂದು ಥಾಮಸ್‌ ಪಿಕೆಟ್ಟಿ ಅವರು 'ಕ್ಯಾಪಿಟಲ್ ಇನ್ ದಿ ಟ್ವೆಂಟಿ-ಫರ್ಸ್ಟ್ ಸೆಂಚುರಿ' (2014) ಕೃತಿಯಲ್ಲಿ ವಾದಿಸಿದ್ದಾರೆ.

ಜಿಡಿಪಿ ಆಚೆಗಿನ ನೈಜ ಪ್ರಗತಿ

ಶೇ 7.8ರ ಜಿಡಿಪಿ ಬೆಳವಣಿಗೆ ಸ್ವಾಗತಾರ್ಹ. ಆದರೆ ಅದು ಅನೌಪಚಾರಿಕ ವಲಯದಲ್ಲಿ ಕೆಲಸ ಮಾಡುವ ಶೇ 80ಕ್ಕೂ ಹೆಚ್ಚು ಕಾರ್ಮಿಕರಿಗೆ ಸುರಕ್ಷಿತ ಉದ್ಯೋಗವನ್ನು ಸೃಷ್ಟಿಸುತ್ತಿದೆಯೇ? ಶೇ 40ರಷ್ಟು ಯುವ ಪದವೀಧರರಿಗೆ ಉದ್ಯೋಗ ನೀಡುತ್ತಿದೆಯೇ? ಕೃಷಿ ವಲಯವನ್ನು ಚೇತರಿಸುತ್ತಿದೆಯೇ? ಎಂಬ ಪ್ರಶ್ನೆಗಳು ಉಳಿಯುತ್ತವೆ.

ಜಿಡಿಪಿ ಬೆಳವಣಿಗೆಯ ಅಂಕಿ ಬಿಡುಗಡೆಯಾದರೂ ಷೇರು ಮಾರುಕಟ್ಟೆಯಲ್ಲಿ ಅಂತಹ ಉತ್ಸಾಹ ಕಂಡುಬರಲಿಲ್ಲ. ಎಫ್‌ಐಐಗಳು ಒಂದೇ ದಿನದಲ್ಲಿ ₹7,986 ಕೋಟಿಗೂ ಹೆಚ್ಚು ಮೌಲ್ಯದ ಷೇರುಗಳನ್ನು ಮಾರಾಟ ಮಾಡಿವೆ. ಐಎಂಎಫ್‌ ಸತತ ಎರಡನೇ ವರ್ಷ ಭಾರತದ ರಾಷ್ಟ್ರೀಯ ಲೆಕ್ಕಪತ್ರಗಳಿಗೆ 'ಸಿ' ಶ್ರೇಣಿ ನೀಡಿದೆ. ಜಿಡಿಪಿ ಲೆಕ್ಕಾಚಾರದ ವಿಧಾನವನ್ನೂ ಕೆಲವು ಅರ್ಥಶಾಸ್ತ್ರಜ್ಞರು ಪ್ರಶ್ನಿಸಿದ್ದಾರೆ.

ಶೇ 7.8ರ ಜಿಡಿಪಿ ಬೆಳವಣಿಗೆಯು ಆರ್ಥಿಕತೆ ಎಷ್ಟು ಬೆಳೆದಿದೆ ಎಂಬುದನ್ನು ತೋರಿಸುತ್ತದೆ. ಆದರೆ ಆ ಬೆಳವಣಿಗೆಯ ಗುಣಮಟ್ಟ, ಅದರ ಹಂಚಿಕೆ ಮತ್ತು ಅದು ಎಷ್ಟು ಕಾಲ ಮುಂದುವರಿಯಬಲ್ಲದು ಎಂಬುದನ್ನು ಅದು ತೋರಿಸುವುದಿಲ್ಲ. ಹೀಗಾಗಿ, ಆರ್ಥಿಕ ಪ್ರಗತಿಯನ್ನು ಅಳೆಯಲು ಜಿಡಿಪಿ ಮಾತ್ರ ಸಾಕಾಗುವುದಿಲ್ಲ ಎಂಬುದು ಸ್ಪಷ್ಟವಾಗುತ್ತದೆ.

ಸರ್ಕಾರದ ಕಾರ್ಯಕ್ಷಮತೆಯನ್ನು ಕೇವಲ ಜಿಡಿಪಿ ಬೆಳವಣಿಗೆಯ ಆಧಾರದ ಮೇಲೆ ಅಳೆಯುವುದು ಈಗ ಸೂಕ್ತವಲ್ಲ. ಉದ್ಯೋಗ ಭದ್ರತೆ, ಹಣದುಬ್ಬರ ನಿಯಂತ್ರಣ, ಆದಾಯದ ಹಂಚಿಕೆ ಮತ್ತು ಅಗತ್ಯ ಸೇವೆಗಳ ಲಭ್ಯತೆ ಸೇರಿದಂತೆ ಹಲವು ಮಾನದಂಡಗಳ ಆಧಾರದ ಮೇಲೆ ಆರ್ಥಿಕ ನೀತಿಗಳ ಪರಿಣಾಮವನ್ನು ಮೌಲ್ಯಮಾಪನ ಮಾಡಬೇಕು.

ಮುಕ್ತ ಮಾರುಕಟ್ಟೆ ಸಮಾಜದಲ್ಲಿ ಅತಿಯಾದ ಪಾತ್ರ ವಹಿಸುತ್ತಿದೆಯೇ? ಜಿಡಿಪಿ ಬೆಳವಣಿಗೆ ಖಂಡಿತವಾಗಿಯೂ ಸ್ವಾಗತಾರ್ಹ. ಆದರೆ ಮಾರುಕಟ್ಟೆಗಳು ಕೇವಲ ಲಾಭಕ್ಕಾಗಿ ಅಲ್ಲ, ಸಮಾಜದ ಹಿತಕ್ಕಾಗಿ ಕೆಲಸ ಮಾಡಬೇಕು ಎಂದು ನೊಬೆಲ್‌ ಪ್ರಶಸ್ತಿ ವಿಜೇತ ಅಮರ್ತ್ಯ ಸೇನ್‌ ಅವರು 'ದಿ ಐಡಿಯಾ ಆಫ್ ಜಸ್ಟಿಸ್' (2009) ಕೃತಿಯಲ್ಲಿ ಪ್ರತಿಪಾದಿಸಿದ್ದಾರೆ. ನಿಜವಾದ ಪ್ರಗತಿಗೆ ಸಮಾನ ಬೆಳವಣಿಗೆ ಮತ್ತು ಸಮಾನತೆ ಅಗತ್ಯ. ಶೇ 7.8ರ ಜಿಡಿಪಿ ಬೆಳವಣಿಗೆ ಮಾತ್ರ ಸಾಕಾಗುವುದಿಲ್ಲ. ಉದ್ಯೋಗ ಸೃಷ್ಟಿ, ಕೌಶಲಾಭಿವೃದ್ಧಿ ಮತ್ತು ಸಾಮಾಜಿಕ ಭದ್ರತೆಯ ಜೊತೆಗೆ ಬೆಳವಣಿಗೆಯ ಲಾಭ ಎಲ್ಲ ವರ್ಗಗಳಿಗೂ ತಲುಪಬೇಕು.

2047ರ ವಿಕಸಿತ ಭಾರತ ಗುರಿಯತ್ತ ಸಾಗುತ್ತಿರುವ ಸಂದರ್ಭದಲ್ಲಿ, ಜಿಡಿಪಿ ಬೆಳವಣಿಗೆಯ ಜೊತೆಗೆ ಉದ್ಯೋಗ ಸೃಷ್ಟಿ, ಕೌಶಲಾಭಿವೃದ್ಧಿ, ಸಾಮಾಜಿಕ ಭದ್ರತೆ ಮತ್ತು ಸಂಪತ್ತಿನ ಸಮಾನ ಹಂಚಿಕೆಗೆ ಒತ್ತು ನೀಡುವ ನೀತಿಗಳ ಅಗತ್ಯವಿದೆ. ಶೇ 7.8ರ ಹೊಳೆಯುವ ಸಂಖ್ಯೆಯ ಹಿಂದೆ ಅಸಮಾನತೆ, ನಿರುದ್ಯೋಗ ಮತ್ತು ಕೃಷಿ ವಲಯದ ನಿಧಾನಗತಿಯ ಮತ್ತೊಂದು ಚಿತ್ರವಿದೆ. ಆ ಚಿತ್ರವನ್ನೂ ಗಮನಿಸುವುದು ಅಗತ್ಯ.