मिथलेश कुमार असे बोगस आयपीएस बनलेल्या युवकाचे नाव आहे.

मिथलेश कुमार याची 2 लाख रुपये घेऊन फसवणूक केल्याचे तपासादरम्यान समोर आले आहे. मिथलेश कुमार हा लखीसराय जिल्ह्यातील हलसी पोलिस ठाणे क्षेत्रातील गोवर्धन बिघा गावचा रहिवाशी आहे. मिथलेश कुमार याची 2 लाख रुपयांत फसवणूक करण्यात आली असून नोकरीचे आमिष दाखवून तरुणांना लुटणाऱ्या टोळीचा शोध आता पोलिसांकडून घेतला जात आहे.

मिथलेश हा आयपीएसची वर्दी, डोक्यावर टोपी, कमरेला पिस्टल लटकवून आपल्या घरातून दुचाकीवरून निघाला होता. मिथलेश हा सिकंदरा चौक येथे थांबला असता त्याला पाहण्यासाठी नागरिकांनी गर्दी केली होती. मिथलेशचा अवतार पाहून अनेकांना ही बोगसगिरी असल्याचे लक्षात आले. त्यामुळे, गर्दीतील एकाने सिकंदरा पोलिस ठाण्याचे अधिकारी मिंटू कुमार सिंह यांना फोनद्वारे माहिती दिली. त्यानंतर, सिकंदरा पोलिसांनी मिथलेश कुमारला येथून ताब्यात घेतले. तसेच, त्याच्याकडे चौकशी केली असता धक्कादायक आणि आश्चर्यकारक माहिती समोर आली आहे.

मिथलेश याची मनोज सिंह याने पोलिसांत नोकरी लावतो म्हणत, त्याच्याकडे पैशांची मागणी केली होती. त्यामुळे, मिथलेशने आपल्या मामाकडून 2 लाख रुपये घेऊन मनोज सिंह याला दिले. आपल्याला पोलिस खात्यात नोकरी लागेल, या अपेक्षेने त्याने पैसे दिल्याचे पोलिसांना सांगितले. विशेष म्हणजे मनोज सिंह याने 2 लाख रुपये घेतल्यानंतर दुसऱ्यादिवशी आयपीएसची खाकी वर्दी, पिस्टल आणि टोपीही मिथलेशला दिली. त्यामुळे, नवी वर्दी घालून आईचा आशीर्वाद घेऊन मिथलेश मनोज सिंह याच्याकडे उरलेले 30 हजार रुपये देण्यासाठी निघाला असताच त्याच्या रंगरुप आणि पेहरावावरुन त्याच्याबद्दल संशय निर्माण झाला. त्यामुळे, पोलिसांनी त्याला ताब्यात घेतले असून त्याची चौकशी करण्यात येत आहे. दरम्यान, या घटनेची राज्यात व सोशल मीडियावर जोरदार चर्चा रंगली आहे.