यूपीएससी करणाऱ्या बिरदेवला पहिल्या दोन प्रयत्नांत अपयश आले. मात्र, यंदा यश खेचून आणले आहे.

UPSC परीक्षेत देशात ५५१ वी रँक मिळवून भारतीय पोलिस सेवेत अधिकारी होण्याचे स्वप्न साकार केले आहे. परीक्षेचा निकाल जाहीर झाला त्या वेळी देखील बिरदेव हा सीमाभागात मेंढ्या चारण्यासाठी घेऊन गेला होता. सीमाभागातील एका पालावर बिरदेवचा धनगरी फेटा बांधून अन् घोंगडं देऊन आगळावेगळा सत्कार करण्यात आला असून, संबंधित फोटो सोशल मीडियावर व्हायरल होत आहे.

बिरदेव लहान असताना, त्याचे आई-वडील मोलमजुरी करून कुटुंबाचा उदरनिर्वाह करत होते. बिरदेवला शिक्षणासाठी मिळेल ते काम करावे लागले. लहान वयातच त्याने मेंढरे चारण्याचे काम केले. त्यातून वेळ काढून तो अभ्यास करायचा. त्याच्या या यशाचं कौतुक अख्खा महाराष्ट्र करत आहे.

बिरदेव सिद्धप्पा ढोणे या मेंढपाळ कुटुंबात जन्मलेल्या तरुणाने UPSC परीक्षेत मिळवलेले यश हे खऱ्या अर्थाने डोळे दिपवणारे असं नेत्रदीपक आहे. केंद्रीय लोकसेवा आयोगाच्या परीक्षेत देशात ५५१ वी रँक मिळवून बिरदेवने संघर्ष, चिकाटी आणि मेहनतीचे उत्तम उदाहरण घालून दिले आहे. बिरदेवचा संघर्ष फक्त UPSC करणारेच नाहीत तर ज्यांना छोट्या अडचणी येतात आणि खचून जातात अशा प्रत्येक युवा तरुणांसाठी प्रेरणादायी आहे.

युपीएससी परीक्षेतून आज आयपीएस झाल्यानंतर त्याने आयुष्याचा खडतर प्रवास सांगितला, त्यातील एक घटना ही आमीर खानच्या सरफरोश चित्रपटातील दृश्याप्रमाणेच म्हणता येईल. ज्या पोलिसांनी बिरदेवची तक्रार घेतली नाही, तो बिरदेव आता आयपीएस अधिकारी बनला आहे. युपीएससीची मुलाखत दिल्यानंतर ज्ञानप्रबोधिनी येथील अभ्यास केंद्रावरुन जात असताना रात्री 11 वाजता राधिका भेळ येथून माझा फोन चोरीला गेला. माझा फोन चोरीला गेला ही गोष्ट मी अद्यापही घरी सांगितली नाही. घरी सांगितलंय की माझा फोन बंद पडलाय. पण खरं तर माझा फोन चोरीला गेलाय. त्यामुळे, आजही माझ्या बीडच्या मित्राचा फोन मी वापरत आहे, असे बिरदेवने सांगितले. तसेच, फोन चोरीला गेल्यानंतर आम्ही पोलिस स्टेशनला गेलो, तेव्हा त्यांनी आम्हाला भावच नाही दिला, माझी तक्रारही घेतली नाही, असे बिरदेवने एका मुलाखतीदरम्यान सांगितले.

विशेष म्हणजे निकाल लागल्यानंतर तो बेळगावमधील अथणीमध्ये मेंढ्या घेऊन गेला होता. वाड्या-वस्त्यावर, माळरानावर जाऊन शिकलेला बिरदेव आता देशसेवत आपले योगदान देणार आहे. त्याच्या या निवडीनंतर सर्वच स्तरातून त्याचा सत्कार, सन्मान केला जात आहे. एखाद्या चित्रपटाला शोभेल अशीच संघर्षगाथा बिरदेवची आहे.